Komîsyona Mafê Zarokan a Şaxa Komeleya Mafê Mirovan (ÎHD) ê ya Amedê, “Rapora Binpêkirinên Mafên Zarokan ên Herêma Rojhilatê Başûr a sala 2018’an” ji raya giştî re eşkere kir.  

 

Di civîna çapemeniyê ya  li Şaxa ÎHD’ê hat lidarxistin de Endamê Komîsyona Mafê Zarokan Parêzser Ercan Yilmaz axivî û diyar kir ku binpêkirina mafê zarokan bedewam dike. Yilmaz, bal kişand ser binpêkirinên mafên zarokan û wiha got: “Tundiya li ser zarokan, îstîsmara zayendî, karkerên zarok û mirinên wan, zewacên di temenê zaroktiyê de, bêperwerdebûna zimanê dayîkê û pergala perwerdê ya giştî, binpêkirinên herî mezin ên li ber çavanin. Pêvajoya şer a li herêmê berdewam dike, herî zêde dibe sedama binpêkirinên mafên zarokan. Bi dehan zarok ji ber teqemeniyên cebilxaneyên leşkerî yên li herêmên pevçûnan hatin hiştin, jiyana xwe ji dest dan û birîndar bûn.”  

 

’22 ZAROKÊN BI DARÊ ZORÊ HATIN XEBITANDIN JIYANA XWE JI DEST DAN’

 

Yilmaz, hin bûyerên di rapora ku komîsyonê amedekiribû de wiha vegot: “Li herêma Rojhilatê Başûr di sala 2018’an de, zarokek ji aliyê hêzên ewlekariyê ve hat kuştin û zarokek jî birîndar bû. Di encama pevçûna bi çekde zarokek birîndar bû. Di encama êrîşa bombeyi de zarokekê jiyana xwe ji dest da. Di encama xetayên fermî û îhmalkariyê de 3 zarokan jiyana xwe ji dest dan û 46 zarok jî birîndar bûn. Ji ber teqemeniyên cebilxaneyan leşkerî yên piştî pevçûnan li herêmê hatin hiştin 2 zarokan jiyana xwe ji dest dan û 2 zarok jî birîndar bûn. Dîsan 2 zarok bi awayekê bi guman û 3 zarok di encama întîxarê de jiyana xwe ji dest dan. 4 zarokan jî hewl dan întîxar bikin. Ligorî daneyên serokwezîrtiyê di sala 2018’an de 22 zarokên bi darê zarê hatin xebitandin jiyana xwe ji dest dane.”

 

'54 ZAROK HATIN BINÇAVKIRIN Û RASTÎ ÎŞKENCÊ HATIN’

 

Yilmaz, da zanîn ku di sala 2018’an de, di bûyerên civîvakî û serdegirtinên malan de 54 zarok hatin binçavkirin û wiha bilêv kir: “Ji van 54 zarokan 5 jê hatin girtin. 2 zarok dibin çavan de rastî îşkecê hatin. Dîsan 3 zarok derve û 2 zarok jî di girtîgehan de rastî îşkeceyê û mûamelyên xerab hatin. Di sala 2018’an de, tundî û îstîsmara li dijî zarokan zarokan berdewam kirin û mafê zarokan hatin bipêkirin. 7 zarokan ji ber tundiya nava malbatê û bûyerên derve de qewimîn jiyana xwe ji dest dan. Bi giştî 14 zarok birîndar bûn, 92 zarok rastî îstîsmarê hatin û 4 zarok jî hatin revandin.”

 

'41 ZAROKAN JIYANA XWE JI DEST DAN’

 

Yilmaz, di dewama axaftina xwe de ev tişt gotin: “Di sala 2018’an de li herêmê herî kêm 41 zarokan jiyana xwe ji dest dan û 64 zarok jî birîndar bûn. Bersûcên zarokan jî bi polîtîkayên ne cezakirinê tên parastin. Ev jî dibe sedem ku binpêkirinên mafên zarokan di asta herî jor de berdewam bikin.”