ÊLIH - Nûçegihanê rojnameya Yenî Ulke Cengîz Altun ê bi boneya têkiliya dewlet û Hîzbullahê derxist holê 27 sal berê hatibû kuştin û di salvegera kuştina xwe de li ser gora xwe hat bibîranîn. Dayika Turkan Altun got: "Heta rojnameger û yên mîna Cengizê min têdikoşin hebin em ê kêm nebin û pirttir bibin." 

 

Nûçegihanê rojnameya Yenî Ulke Cengîz Altun bi boneya têkiliyên dewlet û Hîzbullahê derxist holê serê sibeha 24'ê Sibata 1992'an li Êlihê hatibû qetilkirin. Altun ê ku nûçegihaniya rojnameyê ya Êlihê dikir di salvegera qetilkirina xwe ya 27'emîn de li ser gora xwe ya li Êlihê hat bibîranîn. Malbata Altun, endamên Înîsiyatîfa Rojnamegerên Azad (ÎRA), Parlamentera HDP'ê ya Êlihê Ayşe Acar Başaran, Namzeta Hevşaredariya HDP'ê ya Êlihê Songul Korkmaz, nûnerên rêxistinên civakî yên sivîl, Dayikên Aştiyê û hezkiriyên Altun beşdarî bîranînê bûn û wêneyên Altun danîn ser gorê. Bîranîn di şexsê Altun de ji bo hemû rojnamegerên hatin kuştin bi rêzgirtinê dest pê kir. 

 

'EM KÊM NABIN PIRTTIR DIBIN' 

 

Di bîranînê de ewil dayika Altun, Turkan Altun axivî û wiha got: "Binêhirê kurê min vaye îro her kes li vir e. Kurê min wilo ji min re digot 'Li Vîetnamê bi milyonan însan hatin kuştin, tevî vê yekê jî însan kêm nabin berevajî vê yekê têkoşîna wan mezin dibe.' Wek ku Cengizê min digot li Vîetnamê tevî ewqas zilmê jî însan kêm nebûn berevajî wê zêde bûn. Cengîzê min jî wilo digot. Rast e îro em kên nabin em pirttir dibin. Heta rojnameger û yên mîna Cengizê min têdikoşin hebin em ê kêm nebin û pirttir bibin." 

 

'EM Ê LI PEY RASTIYAN BIÇIN' 

 

Pişt re Berdevkê ÎRA'yê Hakki Boltan axivî û destnîşan kir ku rojanmegerên ji kevneşopiya şopa heqîqetê tên dê qet bêdeng nebin û wiha axivî: "Cengîz ji bo çi hat qetilkirin? Cengîz bi boneya biryargehên Hîzbullahê derxisth olê û têkiliya dewlet û Hîzbullahê derxist holê hat qetilkirin. Yanî bi boneya ku rastiyê û heqîqetê derxist holê hat qetilkirin. Heke wan têkiliyan dernexista holê dibe ku nehata qetilkirin jî. Heqîqetek li holê heye. Em Cengîz û hemû hevalên rojnameger ku hatin qetilkirin bibîr tînin. Bedel û encama wê çi dibe bila bibe em ê li pey heqîqetê meşa xwe dewam bikin." 

 

'DI SERDEMA HERÎ ZOR DE ROJNAMEGERIYÊ KIR' 

 

Parlamentera HDP'ê ya Êlihê Ayşe Acar Başaran jî bi bîr xist ku Altun di serdemek herî dijwar ku her roj bi dehan can li nava kolanan dihatin înfazkirin hat qetilkirin û got: "Di serdema herî zor de rojnamegeriyê kir. Îro jî wek wê serdemê rojanmegerên bi rûmet heqîqetê dinivîsinin. Em ê her tim li gel kedkarên çapemeniya azad cih bigirin." 

 

'KUJER HÊJ NEHATINE DÎTIN' 

 

Hevserokê Şaxa ÎHD'ê ya Êlihê Devran Yildiz jî bal kişand ser zextên wê demê yên dewletê û got: "Wê demê rojnamegeran ji bo nûçeyên rastiyê derxin holê canê xwe danîn holê. Ji wê rojê heta îro tiştek neguheriye. Zext û êrîşên li ser rojnamegeran berdewam dikin. Tevî hemû lêgerîn û dozan jî lê hêj kujerên Cengîz Altun nehatine dîtin." 

 

Piştî axaftinên hatin kirin komê qurnefilan danîn ser gora Altun û bîranîn bi dawî bû.