ÇEWLÎG - Namzetê Hevşaredariya HDP’ê ya Çewlîgê Hişyar Ozsoy, diyar kir ku berî 30 salan Çewlîg hîn xweştir bû û got: “AKP’ê veguherandina bajarvaniyê, vegerand rantê û gel mexdûr kir. Em pirsgirêkên bjarê bi ferasetekê modern çareser bikin. Namzeta Hevşaredariyê Hatîce Kavran jî, da zanîn ku ewê ji bo jinan atolyeyên perwerdê û hilberînê ava bikin.
Namzetên Hevşaredariyên Partiya Demokratîk a Gelan (HDP) ê ya Çewlîgê Hatîce Kavran, Hişyar Ozsoy û namzetên Meclîsê yên Şarederiyê, bi rojnamegerên çapemeniyê yên bajêr re hatin gelhev. Namzetê Hevşaredariya HDP’ê yê Çewlîgê Hişyar Ozsoy di civînê de, projeyên xwe vegotin û mijarên di rojevê de, nirxandin. Ozsoy, bal kişand ser krîza aborî û wiha axivî: “Piştî hilbijartinê bêaramî kûrtir bûye, demokrasî ji holê rabû, serbixwetiya darazê nemaye û hemû hêz li Qesrê hatiyê komkirin. Ji ber vê bêbaweriyek mezin derketiye holê.”
‘AKP TIŞTEKÊ KU BIDE GEL TUNEYE’
Ozsoy, anî ziman ku AKP bi MHP’ê re welat kirine tengasiyê û wiha bilêv kir: “AKP di salên 90’î de jî, navendperest bûn. Îro jî bi MHP’ê re, welat kirine tengasiyê, ji pir dengî û piranîparêziyê dûr ketine. Tişkekê ku bidin gelên Tirkiyeyê tuneye.”
‘EM DIXWAZIN XIZMETEKÊ KU LAYÎQÎ GEL BIKIN’
Ozsoy, da zanîn ku feraseta şaredartiya AKP’ê, ji çand û vizyona bajarvaniyê pir dûre û wiha rêz kir: “Li şûna ku budçeyê li gorî pêdiviyên gel bi kar bîne, nîvê wê pêşkêşî rantxwerên xwe kirine. Ji her deverên Çewlîgê av di pijiqe, lê qûtkirin avê ya li ser gel, gel bêzer kiriye. Em demek dirêje em cihê xwe di rêveberiyên herêmî yên Çewlîgê de nagirin. Lê em di wê baweriyê dene ku, emê vê carê xizmeteke ku layîqî gelê xwe bikin. Ji ber vê em bi kelecanin.”
‘EMÊ DI ŞAREDARTIYÊ DE XIZMETEK ZELAL BIKIN’
Ozsoy, bal kişand ser pirsgirêkên li bajêr tên jiyîn jî û wiha domand: “AKP nikare pirsgirêkan çareser bike. Şaredarî pirsgirêkên gel di cihê wê de çareser dike û budçeya ji bo şaredartiyê tê veqetandin jî bi gel re bi kar tîne. Di serî de em soza vê yekê didin. Emê budçeya lêçûnên bingehîn ji bo berjewendiyên gelê Çewlîgê bi kar bînin. Hemû hesabê hemû qirûşan jî bidin gelê xwe. Emê di şaredartiyê de xizmetek zelal bikin.”
DI ROJEVA KAVRAN DE JÎ JIN HEBÛN
Namzeta Hevşaredariya HDP’ê Hatîce Kavran jî, bal kişand ser pirsgirêkên jinan ên li Çewlîgê dijîn û wiha axivî: “Li Çewlîgê, qadekê ku jin lê rehet bikin tuneye. Emê weke şaredariyê atolyeyên perwerdê û hilberînê vekin ji bo jinan. Emê di hemû qadên jiyanê de jinan aktiftir bikin. Yên malbatê bi rêve dibin jinin û malbat jî yekîneyek biçûk a civakê ye. Nîva civakê ji jinan pêk tê. Em li dijî feraseta jinan tune dihesîbîne. Emê di hemû qadên jiyanê de xizmeta gelê xwe bikin.”
Namzetên hevşaredariyê piştî axaftinê bersiva pirsên rojnamegean dan, pirsgirêkên bajarê nirxandin û derbarê çareseriyê de pêşniyarên xwe vegotin.