Li dijî tecrîdkirina Rêberê PKK'ê Abdullah Ocalan, çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven di roja 111'an de didome. Bi heman daxwazê li gelek girtîgehan jî çalakiya greva birçîbûnê di roja 73'yan de ye. Parlementerên HDP'ê Ayşe Surucu û Huda Kaya ji bo vê bang li hikûmetê kirin ku tecrîd bi dawî bibe. 

 

‘NE DIXWAZIN BIBÎNIN NE JÎ BIBIHÎSIN' 

 

Parlementera HDP'ê ya Rihayê Ayşe Surucu, diyar kir ku grevên birçîbûnê di asteke krîtîk de ne û dibe ji nişkave li girtîgehan mirin çêbibe. Surucu, bi bîr xist ku tenê daxwazeke Leyla Guven û girtiyên di greva birçîbûnê de ne heye û ew jî rakirina tecrîda li ser Rêberê PKK'ê Abdullah Ocalan e. Surucu, destnîşan kir ku ger tecrîdkirina Ocalan bi dawî bibe wê li welat şert û mercên aştiyê jî çêbibin û got: "Li Tirkiyeyê, îktîdar li ber grevên birçîbûnê guhên xwe û çavên xwe girtine. Ne dixwazin vê qîrînê bibihîsin ne jî bibînin." Surucu, anî ziman ku divê saziyên navnetewî û hêzên demokrasiyê yên Tirkiyeyê li dijî vê bêhiqûqîtiyê derkevin û got: "Em hem li parlementoyê hem jî li her derê Tirkiyeyê têdikoşin, lê divê em hîn bêtir bitêkoşin." 

 

‘DEMILDEST DIVÊ TEV LIV Û TEVGER ÇÊBIBIN' 

 

Surucu, ji ber bdengiya ji bo Leyla Guvenê Meclîsê rexne kir. Surucu, bi bîr xist ku Guven endameke vê meclîsê ye û divê meclîs ji bo vê yekê tev bigere. Surucu, diyar kir ku ew wek koma HDP'ê di hemû rûniştinên meclîsê de vê rewşê dixin rojevê, lê belê ev yek têr nake û divê hemû partiyên muxalif jî bi hesas nêzî vê rewşê bibin. Surucu, destnîşan kir ku çalakiyên greva birçîbûnê niha di asteke pir krîtîk de ne û got: "Dibe ji nişkave li girtîgehan mirin çêbibe. Ji bo ev yek çênebe divê hevdîtin bi Birêz Ocalan re bên çêkirin û tecrîd bi dawî bibe. Ma em ê heta kengî li ber vê bêhiqûqîtiyê bêdeng bimînin. Ma divê îlle gerek mirin çêbibe." 

 

‘DAXWAZEKE EHLAQÎ Û MIROVÎ' 

 

Parlementera HDP'ê ya Stenbolê Huda Kaya jî, diyar kir ku piştî Tirkiye radestî polîtîkayên şer hatiye kirin 81 milyon mirov bedêla vê yekê didin û got: "Ji bo aştiyê pêdivî bi bedêleke wisa tune ye. Tenê divê em bi hev re biaxivin û muzakere bikin. 81 milyon mirov reng û dengê wan çi dibe bila bibe, divê em jiyaneke azad, wekhev û birûmet ava bikin. Daxwaza kesên di greva birçîbûnê de ne daxwazeke giran e, daxwazeke pir ehlaqî û mirovî ye. Divê pêk bê." 

 

‘EM AZADIYÊ BÊHN BIKIN' 

 

Kaya, destnîşan kir ku tecrîdkirina Rêberê PKK'ê Abdullah Ocalan tesîrê li 81 milyon mirovî dike û bal kişand ser divêtiya pêvajoya muzakere, polîtîkayek ji bo aştiyê. Kaya, destnîşan kir ku ger ev yek pêk bê wê tevî gelên Tirkiyeyê bala hemû herêmê û cîhanê bikişîne û got: "Niha weziyeta Tirkiyeyê di warê pratîkên xirab di di rêza ewil de ye. Daxwaza me ew e ku bila tecrîda li ser jiyan û fikrên gelan rabe û em bi hev du re azadiyê bêhn bikin û aştiyê berbelav bikin. Pêdiviya mirovan bi aramî û bêhnstendinê heye. Ev tiştekî pri xwezayî ye."