Çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven ku li dijî tecrîdkirina Rêberê PKK'ê Abdullah Ocalan da destpêkirin, ji 8'ê Mijdara 2018'an ve didome. Her wiha bi heman daxwazê li gelek girtîgehan çalakiya greva birçîbûnê ya 331 girtiyî jî didome. 

 

Li Girtîgeha Jina ya Gebzeyê Ozlem Soyler ku ji 16'ê Kanûna 2018'an ve di greva birçîbûnê de ye, nameyek şand. 

 

ÇALAKIYEKE ZEHMET

 

Soyler, destnîşan kir ku çalakiya greva birçîbûnê li gelek deverên cîhanê bi sedemên polîtîk tên kirin û piştî ew daxilî vê çalakiyê bûye xwe wekî "endamê cîhana demokratîk" hîs dike. Soyler got: "Tevî gelek mînakên li cîhanê, di dîroka Komara Tirkiyeyê de jî li zindana Amedê di sala 1981'ê de şoreşger xwedî li rûmeta cîhanê derketin û bi çalakiya xwe bûn rêya azadiyê. Çalakiya greva birçîbûnê çalakiyeke zehmet e. Ji bo hemêzkirina vê zor û zehmetiyê divê mirov pêşî bawer bike ku wê mirovatî bi awayekî aştiyane bijî." 

 

Soyler, destnîşan kir ku tecrîda li ser Ocalan li ser hemû civakêî siyaset, jin û hiqûqê tê pêkanîn û got: "Grava Îmraliyê, proto-tîpa civakekê ye ku pergala dewletê xwe lê diceribîne. Tiştên li wir pêk tên li civakê tên ferzkirin. Lê Birêz Ocalan hay ji vê heye û loma li ber xwe dide. 21 sal in li ber xwe dide. Loma ji bo ev tecrîd bi dawî bibe me dest bi çalakiyeke wisa kir. Ger tecrîda li Îmraliyê bê şikandin û dewlet di çarçoveyeke hiqûqî û ehlaqî de qanûnên xwe pêk bîne wê polîtîkaya tecrîdê, Rewşa Awarte jî bişikê." 

 

‘HETA TECRÎD NEŞIKÊ WÊ DEWAM BIKE' 

 

Soyler, bilêv kir ku heta tecrîd ranebe wê çalakiya wan dewam bike. Solyer, destnîşan kir ku ger hikûmet dawî li tecrîdê bîne ew ê jî çalakiya xwe bi dawî bikin û got: "Lê ger gav neyên avêtin û ev yek dewam bike, em zanibin em ê bimirin jî dîsa em ê dev ji çalakiya xwe bernedin. 

 

Soyler, diyar kir ku 74 roj in di grevê de ye lê belê dîsa jî moralê wê xurt e û got: "Lê belê ji ber grevê bêhaliyek çêbûye. Vîtamîna B1 nayê dayîn. Vîtamîna B12 tê dayîn. Heta niha em ji aliyê bijîşkên pispor an jî bijîşkên serbixwe nehatine muayenekirin. Gardiyanên ku peywira hemşîereyan girtina her roj tên li kîlo û tansiyona me dinerin. Bijîşkê revîrê heta 20 rojan jî nehat. Carinan tê û tenê dibêje 'hûn çawa ne?'" 

 

‘EM BI HEV RE BIJÎN' 

 

Soyler bang li raya giştî jî kir û got: "Divê civaka Tirkiyeyê û gelê Kurdistanê rewşa me fam bike. Ev çalakî tê wateya ku ew ê bi awayekî aştiyane û bi hev re bijîn. Divê biratiya herdu gelên qedîm ku bi hezaran sal in bi hev re dijîn nebe qurbanê polîtîkayên dewlet û hikûmeteke demborî. 40 sal in herdu hêl jî pir êşiyan û bedêl dan. Rengê êşê tune ye, lê rengê aştî, biratî, dostanî û demokrasiyê heye. Ev reng jiyan bi xwe ye. Werin em bi hev re bijîn. Cenazeyên Denîz Gezmîşan, Mahîr Çayanan, Kemal, Mazlûm û Xeyriyan ji van girtîgehan derketin. Daxwaza me ji raya giştî ev e ku berî trajediyên mezin biqewimin bibin dengê vê çalakiyê. Em kurd in, tirk in, ermen û laz in. Wexta em bi hev re bin em xwişk û bira ne. Ev tecrîd nahêle em guh bidin hevdu, nahêle em hevdu fêm bikin. Divê herkes bibe yek û vê tecrîdê bişikîne."