Piştî li Nisêbîna Mêrdînê di 14'ê Adara 2016'an de qedexeya derketina derve hat îlankirin, di 26'ê Gulana 2016'an de 17 jê zarok 70 kes ji navçeyê hatibûn tahliyekirin. Kesên ji navçeyê hatin tahliyekirin hatibûn binçavkirin û paşê hatibûn girtin. Piştî 2 salan, du îdianame hatin amadekirin û ji aliyê Dadgeha Cezayê Giran a 4'an a Mêrdînê ve hat qebûlkirin. Piştî îdianame hat qebûlkirin darizandin jî dest pê kir. Zarokên hatin girtin ji ber temenên wan, danişîna wan bi awayekî girtî tê kirin û heta niha 7 caran derketine pêşberî dadger. 53 kesên din jî heta niha 6 caran derketine pêşberî dadger. 

 

Yek ji kesên di dozê de tê darizandin jî Resûl Ergun e. Ergun, der barê tiştên qewimîn, darizandin û helwesta girtiyan de pirsên Ajansa Mezopotamyayê (MA) bersivandin. 

 

'NE ŞIDET, WEHŞET E'

 

Ergun, diyar kir ku ji roja hatine binçavkirin heta niha tên îşkencekirin û divê ev pêvajo wekî şidetê neyê bilêvkirin, wekî wehşetê bê bilêvkirin. Ergun got: "Wekî gelek hevalên xwe ez jî birîndar bûm. Ji stuyê xwe, mil û lingên xwe birîndar bûm. Heta niha em qet nehatine tedawîkirin. Diviya roja ewil bihata kirin. Ez birîndar bûm. Min û 4 hevalên min ji ber kamerayan birin devereke din û em serdevkî dirêjî erdê kirin û ji paş ve destên me kelemçe kirin. Paşê li me dan. Dû re em birin dibistaneke ku veguherandibûn baregeha leşkerî. Ev nêzîkatiya derî mirovahiyê heta wir dewam kir." 

 

Ergun, bilêv kir ku paşê wan birine jêrzemîna dibistanê û dema wan dadixistin jêrzemînê heqaret li wan dikirin, li wan didan û got: "Lê belê îşkence û wehşeta sereke niha dest pê dikir. Te digot qey zewqê distînin. Di dema vê wehşetê de min kir qîrîn, ev yek bala wan kişand û vê carê li deverên min ên hesa û bi taybetî jî li deverên min ên birîndar dan. Ev yek bi qundaxa çekan, bi pense û amûrên bi vî rengî dihat kirin. Bênavber li me didan. Ê di westiya diçû, yekî din dihat."

 

Ergun, diyar kir ku hêzên dewletê wêne û dîmenên wê wehşetê digirtin. Ergun, anî ziman ku ji ber birîna wî nû bû û necebirî bû tim xwîn jê dihat û piştî demekê ew ji ser hişê xwe çûye. Ergun, da zanîn ku ew du rojan li wê jêrzemînê mane û hevalên wî gotine wexta ew ji ser hişê xwe çûye jî îşkence dewam dikir. Ergun, anî ziman ku paşê wan bi wesayîteke zirxî birine emniyeta Nisêbînê û di dema çûyînê de jî dihatin îşkencekirin. Ergun got: "Vê carê POH û JOH ketin dewrê û ev wehşet bi versiyoneke din dewam kir. Li emniyetê jî heman muamele dewam kir. 3 soran li ser hev kî hat heqaret kir û îşkence kir. Piştî 3 rojjan şûnde, em birin Nisêbînê. Dozgerekî ku nig avêtibû ser nig û di dest de tizbî bêyî tiştekî bipirse biryara girtina me da û em hatin girtin. Lê ev pêvajo li zindanê jî dewam kir. Ji wê rojê heta niha em hem di warê derûnî hem jî di warê fizîkî de bi şidetê re rû bi rû ne." 

 

'SENARYOYA LÎSTIKEKÊ YE' 

 

Ergun, ji bo pêvajoya darizandinê jî destnîşan kir ku îdianameya hatiye amadekirin, ne îdianame ye senaryoya lîstikekê ye û got: "Di her danişînê de hem me hem parêzerên me me tim anîn ziman. Li ser medyaya civakî û di dîmenên kamerayan de ev yek heye. Ya ku hêêzn dewletê û dewlet li me dike sûc e û ev dîmen belgeya van sûca ye. Yanî li dijî qanûna bingehîn, Peymana Mafên Mirovan a Ewropayê tev digerin. Ev nayên hesibandin. heyeta dadgehê jî dibe hevkarê vî sûcî û vê bêhiqûqîtiyê. Ev belgeyên aşkere ne ku neheqî li me tê kirin." Ergun, bilêv kir ku dDi îdianameyê de jî tiştekî li gorî aqilan û matiqê tune ye û got: "Îdianme senaryoya lîstikekê ye. Heyeta dadgehê jî listikvanê wê ne. Eywana danişînê jî sahne ye. Ev darizandin, darizandine ku îktîdara faşîst dixwaze pê ser kuştin, rûxandin û şewitandina zarok, ciwan, jin û extiyarên li Cizîr, Sûr, Şirnex, Nisêbîn û deverên din ên Kurdistanê bigire. Ev îdianame ji bo vê hatiye amadekirin." 

 

'DIXWAZIN BERXWEDANA GELAN BEREVAJÎ BIKIN'

 

Ergun, anî ziman ku wan di hemû danişînan de bilêv kiriye ku tu daxwazek wan û hêviyek wan ji dadgehê tune ye û got: "Bi taybetî dixwazim vî tiştî bibêjim; dixwazin di doza Nisêbîne de, di şexsê me de berxwedana gelê kurd a li kurdistanê, daxwaza azadiyê ya gelên Tirkiyeyê û berxwedanên bêhempa pûç bikin. Her wiha dixwazên bi vê plana xwe bi gelên Tirkiye û Kurdistanê çok bidin şikandin û wan teslîm bigirin. Di dîrokê de jî eyan û beyan e ku serdest dixwazin dîroka berxwedanê ya gelan berevajî bikin. Niha ya tê kirin jî ev e. Jixwe heqîqet li holê ye û pir aşkere ye. Nikarin rojê biseyînin. Em li cem gelê xwe ne û wê helwesta me, sekna me planên îktîdara faşîst pûç bike. Loma hem daxwza min hem ya hevalên min û hem jî ya gelê me; rêveberiryeke xwe bi xwe ye. Em ê tu carî doa daxwazeke şexsî nekin. Ev ne ehlaqî ye." 

 

'EM Ê BI SER BIKEVIN

 

Ergun, bal kişand ser tecrîdkirina Rêberê PKK'ê Abdullah Ocalan û çalakiyên greva birçîbûnê yên li dijî tecrîdê jî û got: "Berî her tiştî tecrîda di şexsê Ocalan de li ser gelê kurd û gelên Rojhilata Navîn de tê pêkanîn şermezar dikim. Her wiha komploya navnetewî ya li dijî Rêber Apo jî şermezar û lanet dikim. Niha bi pêşengiya hevrê Leyla Guven berxwedanek heye. Paşê ev berxwedan li zindanên T.C. û Kurdistanê bi ruhê Zindana Amedê derket holê. Bi vê jî nema, agirê vê berxwedanê xwe berda derve jî. Zarokên agir û rojê careke din rabûn ser piya. Niha li her derî meşaleya berxwedanê dîsa bilind dikin. Ez û hevrêyên xwe berxwedana zarokên Kawa û milîtanên Rêber Apo yên serî natewînin silav dikin û bi rêzgirî bejna xwe ditewînin. Em bawer dikin ku em ê bi vê berxwedanê bi ser bikevin. Wekî hevrê Leyla Guven gotî; divê hem gelê kurd, hem gelê tirk, heê gelên bindest, şervanên azadiyê û girtiyên azadiyê di vê pêvajoya dîrokî xwe xwe rexne bikin. Armanca tecrîdê, tunekirina deng û hêviya gela ye." 

 

Herî dawî Ergun got: "Bedêl çi dibe bila bibe, em ê di vê rêya azadî û biratiyê de serî netewînin û çi bikeve ser milê me em ê bikin. Wekî fermandarê nemirê ê Nisêbînê Xebatkar gotî; Tovên berxwedanê ketine nav xwîna me. Me hêviya azadî, bawerî û serketinê ku dê qet neyê jibîrkirin li zarokên cîhanê peyda kir. Di siberojan de em ê tevî wan mezin bibin. Zû an deren, teqez em ê bi ser bikevin."