HATAY - Nûnerên rêxistinên civaka sivîl û partiyên siyasî yên Hatayê, şik û gumanên xwe yên ji bo operasyona muhtemel a Îdlibê anîn ziman û pirsîn: "Piştî operasyonê wê komên îslamî biçin kuderê?"
Ji roja ku şerê li Sûriyeyê dest pê kiriye heta niha, Hatay bûye binkeya komên îslamî û ger li Îdlibê operasyonek çêbibe wê herî zêde bandorê li Hatayê bike. Ji roja ku şer dest pê kiriye heta niha nêzî 400 hezar sûriyeyî hatine bajêr û tê gotin li navçeyên nêzî sînor endamên El Nûsra/Heyet Tahrîr El Şam û OSO'yê bi rihetş digerin. Nûnerên rêxistinên civaka sivîl û partiyên siyasî yên Hatayê, ji ber vê rewşê nerihet û nerazîbûnên xwe anîn ziman.
EWLEHÎ
Endama Desteya Rêvebir a Navendî ya SYKP'ê Hulya Kavûk, diyar kir ku piştî operasyona Efrînê şik û gumaneke mezin li bajêr peyda bûye. Kavûk, bilêv kir ku li navenda Hatayê û navçeyên wê pirsgirêka ewlehiyê rû daye û ji ber gelek kes ji Sûriyeyê koçî bajêr kirine bêhizûriyek peyda bûye. Kavûk got: "Piştî teqîna li Reyhanliyê, ev şik û guman zêde bû. Her wiha ji ber hebûna komên îslamî, endîşeyên gel n ji bo ewlehiyê zêde bûne."
Kavûk, diyar kir ku li bajêr kesên li dijî operasyona Efrînê derketin, paşê polîsan avêtiye ser malên wan û hatine binçavkirin. Kavûk got: "Çeteyên cîhaddîst ên di oeprasyona Efrînê de cih girtin, li bajarên nêzî sînor tên sekinandin. Ger operasyonek li Îdlibê biqewime û ev kes tev li komên li Îdlibê bibin, wê pirsgirêka ewlehiyê zêdetir bibe. Ji roja şerê Sûriyeyê dest pê kirye heta niha pirsgirêkên aborî jî zêdetir bûne. Niha li bajêr nêzî 400 hezar penaber hene. Hem ji ber vê hem jî ji ber girtina deriyên sînor bazirganî qediya û betalî zêde bû. Wê ev rewş hem gelê Hatayê xizantir bike hem jî gel mudaxileyî îdlibê bê kirin û çete li vira bên bicihkirin, dibe ji pirsgirêkên di dema teqîna Reyhanliyê de rû dan bêtir pirsgirêk rû bidin."
‘WÊ PENABER ZÊDE BIBIN'
Serokê Şaxa Komeleya Mafên Mirovan (ÎHD) a Îskenderûnê Coşkûn Selçûk jî, diyar kir ku Hatay cînarê Sûriyeyê ye û 8 sal in tesîrê ji şerê Sûriyeyê digire. Coşkûn, bilêv kir ku ger mudaxileyî îdlibê bê kirin pêşî wê pirsgirêka penaberan rû bide û ger operasyon çêbibe wê hejmara penaberên li bajêr zêdetir bibe. Coşkûn, pirs kir ku îjar wê hêzên çekdar ên li Îdlibê bi ku ve biçin? Cpşkûn, diyar kir ku ji ber ev pris nayê bersivandin endîşe û gumanên Hatayê zêde bûne.
‘WÊ KOMÊN RADÎKAL PÊŞÎ BÊN HATAYÊ'
Hevseroka HDP'a Hatayê Sûltan Başaran jî, diyar kir ku cîhanê bi çavê xwe dîtiye ku OSO'ya AKP destekê didê li Efrînê çi kiriye û ger li Îdlibê operasyonek çêbibe wê pêşî ev komên navborî berê xwe bidin Hatayê. Başaran, bilêv kir ku 8 sal in li Hatayê pirsgirêka ewlehiyê heye û got: "Hem di warê aborî hem di hatina komên cîhadparêz, endîşeyên gel zêdetir dikin. Bi salan e ev kom bi rihetî digerin, bi rihetî tên û diçin. Ger li Îdlibê operasyonek çêbibe wê ev kom pêşî bên Hatayê."
Seroka Şaxa Malên Gel a Hatayê Eylem Mansûroglû jî, destnîşan kir ku şerê Sûriyeyê, hem di warê aborî hem jî di warê siyasî de zêde bandor li Hatayê kiriye. Her wiha Mansûroglû, bal kişand ser girtina deriyê sînor ê Cîlvegozuyê û operasyona muhtemel a Îdlibê. Mansûroglû, anî ziman ku herkes dizane ku Îdlib navenda komên îslamî yên radîkal e û got: "Ger operasyon çêbibe, wê ev kom bi ku ve biçin?" Mansûroglû, destnîşan kir ku ger komên navborî çekên xwe deynin û bên Hatayê, dîsa jî wê bibin sedema bêhizûrî û bertekên mezin.