Rojnameger û edîtora Ajansa Nûçeyan a Jin (JINHA) Zehra Dogan ku ji ber li Navçeya Nisêbînê di serdema qedexeya derketina kolanan a 2016'an de nûçe çêkir û hat girtin, piştî 2 sal û mehekê li girtîgehê ma hat berdan.

Edîtora JINHA a bi KHK'ê hat girtin û Rojnameger Zehra Dogan ku bi îdîaya "Propaganda rêxistinê kiriye" hat girtin, piştî ji Girtîgeha Jinan a Tarsûsê hat berdan, delîlên ku bû sedema girtina xwe û rewşa girtiyên li girtîgehê di çalakiya grevê de nirxand. 

 

‘ÇIMA MIN WÊNEYÊ BAJARÊ XERABE XÊZ KIRIYE' 

 

Rojnameger Dogan, diyar kir ku li Nisêbînê hovîtiyek pir mezin pêk hat û ew hovîtî tu car nayê ji bîr kirin. Dogan, destnîşan kir ku heman hovîtî li navçeyên Sûr, Cizîr, Kerboran, Dêrik û Hezexê jî pêk hatin û wiha got: "Li dijî wê hovîtiyê berxwedanek pir mezin jî derket holê. Gelek rojnamegerên ku ew hovîtiya li Nisêbînê û bajarên din kirin nûçe, hatin darizandin û hatin girtin. Yek ji rojnamegera hat girtin jî ez bûm. Ji min re gotin 'Tu çawa wêneyê bajarekî hatiye xerakirin xêz dike?' û ceza li min birîn. Ya ku bajar xera kiribû ne ez bûm. Min tenê wêneyê heyî xêz kir. Tişta heyî min kir resîm. Yên xera kirin ceza nexwarin, lê yên bajarê hatiye xerakirin xêz kirin û kirin nûçe ceza xwarin. Wan ev wêneyê bajarê xerabe belav kir, lê ji ber ku min ew wêne xêz kir ceza li min birîn." 

 

‘GIRTÎGEH WÊNEYÊ DERVE YE'

 

Dogan, da zanîn ku geşedanên li girtîgehê pêk tên wêneyên rewşa derve nîşan didin û wiha berdewam kir. "Li girtîgehê yên li dijî zextan dengê xwe bilind dikin rastî cezayê hucreyê tên. Ger ku girtîyek 3 caran rastî cezayê hucreyê bê înfaza wî-ê dişewite. Em dikarin mînakekê bidin. Hevala me Songul  heye. 27 sal rastî cezaye muebetê hatiye. Ev heval ji ber ku li ser piyan jimar neda rastî cezayê hucreyê hat û înfaza wê şewitî. Dê 45 salan girtî bimîne. Çima? Ji ber ku li dijî rêveberiya girtîgehê derketiye. Di xwarina girtîgehê de kêzik û mû derdikeve. Carekê ji xwarê salyangoz jî derket. Li qawîşa 20 kesan têra 5 kesan xwarin didin. Ji bo zorê li sebra me bikin her tiştî dikin. Rêveberiya girtîgehê baş dizanin ku em di serdema greva birçîbûnê de ji bo xwarinê daxwazname nadin, ew bi zanebûn xwarinê li ser me kêm dikin. Dizanin ku em dernakevin hevdîtinê van tiştan li me dikin. Dixwazin bi vê yekê înfazê bişewitînin. Hemû mafên bingehîn desteser dikin. Mafê telefonê ji girtiyan distînin. Ji ber ku min bi hevala xwe re stran got ez rastî cezayê dîsîplinê hatim. Mafê me yê telefon û nameyan ji destê me hat girtin."  

 

‘MIN GIRTÎGEH KIR STUDYOYA WÊNEYAN'

 

Dogan ku di heman demê de wênesaz e destnîşan kir ku wê hunera xwe ya wênesaziyê li girtîgehê jî berdewam kiriye bi gotina resam Jan Frans van Dael a “Hunermendên gelên bindest û mirovên serpêhatî, ne tenê j bo xwe xwedî huner in. Ew wekî hunermendên ewropa bi serê xwe nakevin atolye û wêne xêz nakin. Ger ku vê yekê bikin tenê wekî ressam bi sînor dimînin. Nikarin bibin hunermendên gel" bal kişand ser erka hunermendiyê. Dogan destnîşan kir ku ger ew ne rojnameger bûya dê nikarîbûya wisa wêne xêz kiribûya û wiha got: "Ger ku ez ne rojnameger bûma, ezê nikaribûma biçûma Nisêbînê. Min dê Nisêbîn nedîta û nejiyam. Min gelek wêne li girtîgehê xêz kir û rêveberiya girtîgehê dest danî ser. Dîsa tişt nabe. Wan ger ku 20 hep wêneyên min perçe kirin min, 300 hep şandin derve. Ez bawer dikim ku min weke hunermendek wênesaz girtîgeh kir atolyeya wêneyan. Min ev bi xêra hevalên xwe kir. Ger ku baweriya hevalên min ên jin bi min tunebûya min ev teqez nikarîbu pêk anîbûya." 

 

‘TIRKIYE DI POLÊ DE MA'

 

Dogan, da zanîn ku Tirkiye ji bo çapemeniye bûye girtîgeh û welatê herî zêde rojnameger lê girtî Tirkiye ye û wiha got: "Ez rojnamegerên girtî wekî şoptarê heqiqetê dibînim. Niha Nedîm Turfent, Ozlem Seyhan, Kibriye Evren, Meltem Oktay gelek rojnamegerên din girtî ne. Tirkiye di qada çapemeniyê de di polê de maye."  

 

SÎSÊ BÎNGOL: EZ LI SER PIYAM IM 

 

Dogan, bal kişand ser rewşa Sîsê Bîngol a hem girtî û hem jî pîr bûye û wiha lê zêde kir: “Mixabin rewşa dayika Sîsê di milê tenduristiyê de qet nebaş e. Herî dawî ez bi peyama wê ji girtîgehê derketim. Got ji yên ez pirsîm re bêj 'Ew cit û serbilind li ser piyan e' Dayika Sise dizane civak û rojnameger li pişta wê ne. Rojnameya Yenî Yaşam her tim di destê wê de ye. Dizanin siyasetmedar ji bo wê têdikoşin. Lê ji ber tenduristiya xwe ji êvarî heta serê sibê nikare razê. Her tim dikuxwe. Hevalên me yên heta serê sibê li ber serê wê nobetê digirin hene. Saziya Tipa Edlî bi gotinên balkêş rapor amade kir. Dibêje 'Ji bo Sisê tahliye bibe xwe xerab nîşan dide' Ev eybek pir mezin e. Şerma mirovahiyê ye. Lê wan dema ev rapor amade kir şerm nekirin. Tu fikra ku Dayika Sisê bê berdan tune ye. Baweriya wê pir mezin e. Baweriya wê ya têkoşînê heye. Ew bersîva her kesî ye. "

 

‘BI GRAVA BIRÇÎBÛNÊ RÛMETDAR IN' 

 

Dogan, bal kişand ser rewşa girtiyên di greva birçîbûnê de jî û wiha bi dawî kir: "Ew bi vê çalakiya xwe ya girevê serbilind û rûmetdar in. Ji ber ku dizanin li dijî tecrîdê di nava têkoşînekê dene û ev yek bêtir wan bi coş û rûmet dike. Ev ji bo wan dibe moral. Her dem govende digerînin. Stranan dibêjin. Ew bawer dikin ku ew dê bi ser bikevin. Ew dibêjin ez di grevê de hebûm û di têkoşînê dejî heme. Mirovên herî xweşik di greva birçîbûnê de ne. Divê em ji dengê wan re bibin deng. Em gelekî ku bêdeng nabin in. Em axaftinê qet ji bîr nekin. Ev bêdengî li me nayê. Em fêrî gotina 'Na' bibin. Em netirsiyan, em carek din nîşan bidin ku em natirsin." 

 

 

MA / Ferhat Çelîk