BEDLÎS – Parlementerê HDP'ê yê Bedlîsê Celadet Gaydali, destnîşan kir ku li Bedlîsê, di serdema AKP'ê de çandinî û sewalvanî hatiye qedandin û fabrîkaya TEKEL'ê jî aliyê îktîdarê ve hatiye girtin û got: "Tu sedemeke ku gelê Bedlîsê deng bide AKP'ê tune ye."
Parlementerê HDP'ê yê BEdlîsê Celadet Gaydali, bal kişand ser girîngiya 31'ê Adarê ya ji bo gelê Bedlîsê û gotinên Erdogan û Wezîrê Karê Navxweyî Suleyman Soylû yên der barê HDP'ê de.
Gaydali, bilêv kir ku îtifaqa AKP-MHP'ê ji bo di hilbijartinê de bi ser bikeve kurd û HDP'ê kirine hedef û got: "Her ku hilbijartin nêz dibe Don Kîşot û Sancho Panzayên me yên xwecihî ji dêvla aş, êrîşî kurdan dikin. Lê dê ev polîtîkayên çewisandinê berevajî bibin. Dê ev di hilbijartina herêmî de şelmaqeke wisa bixwin ku bi ser hişê xwe ve neyên û wê xwe bi xwe xwe birûxînin."
'ÇANDINÎ Û SEWALVANÎ DI DEMA AKP'Ê DE QEDIYA'
Gaydali, destnîşan kir ku li Bedlîsê tevî 4 şaredariyên qeyûm tayînî wan hatine kirin ew ê hemû şaredariyan bi dest bixin û got: "Pir aşkere ye, gel ji partiya îktîdarê sar bûye. Çimkî her kes ditirse û difkire ku ji nişkave ji kar bên avêtin. Bi qasî ez dibînim niha di bezê de HDP li pêş e. Îdia dikim eger fen û fût çênebin, wê HDP li Bedlîsê hemû şaredariyan bi dest bixe. Adilcewaz jî di nav de."
Gaydali, bilêv kir ku li Bedlîsê bi navê çandiniyê tiştek nemaye. Gaydali, destnîşan kir ku Bedlîs debara xwe bi çandinî û sewalvaniyê dikir, lê belê di dema AKP'ê de ne çandinî ne jî sewalvanî ma. Gaydali, anî ziman ku Fabrîkaya Cîxareyan a Tekelê ya Bedlîsê tesîreke baş li aboriya bajêr dikir, lê belê AKP'ê fabrîke girtiye û firotiye kartelên cixareyê. Gaydali got: "Niha di warê aborî de rewşa Bedlîsê qet nebaş e. Hilberîn nemaye. Sibe dusibe wê êrîşî marketan jî bikin. Loma tu sedemek tune ye ku gelê Bedlîsê raya xwe bide AKP'ê. Divê Bedlîsî rojek berî rojekê ji vê gerînekê xelas bibin."
MA / Selman Guzelyuz