SÊRT - Namzetên HDP'ê yên navçeya Hawêlê Ozden Gulmez û Remzî Sarsilmaz, diyar kirin ku ew ê tevî gel navçeyê pêşve bibin û gotin: "HDP, l kuderê be li wir demokrasî û biratî heye. Em jî dixwazin li Hawêlê bibin pira navbera reng û dengê cur bi cur."
Namzetên HDP'ê yên navçeya Hawêl a Sêrtê Ozden Gulmez û Remzî Sarsilmaz, diyar kirin ku ew ê şaredariyê ji dest qeyûm derxînin û tevî gel navçeyê pêşve bibin.
TEMSÎLIYETA WEKHEVIYÊ
Gulmez, diyar kir ku projeyên wan bêtir der barê jin û ciwanan de ne û ji bo jin bêtir daxilî jiyana civakî bibin û ji feraseta baviksalarî rizgar bibin wan hin proje amade kirine. Gulmez, bilêv kir ku atolyeyên ku berê hevşaredarên HDP'î çêkiribûn ji aliyê qeyûm ve hatine girtin û got: "Wexta em bên ser kar em ê ji nû ve van atolyeyan vekirin û hewl bidin jin daxilî jiyana civakî bibin. Em ê ji bo ciwanan jî konsert, konferasn hwd. aktîvîteyên civakiyî li dar bixin. Em ê di warê kar de jî bi awayekî kooperatîfî tev bigerin da ku jin bikaribin bixetin. Em ê havînan jî ji bo zarokan, dibistanên havînê vekin."
Gulmez, destnîşan kir ku li Tirkiyeyê tenê HDP, pergala hevserokatiyê bi rê ve dibe û got: "Em xwe wekhev dibînin. Yanî şaredarî tenê ne ya zilama ye. Divê temsîliyeta wekheviyê li hemû qadên jiyanê hebe."
HILBERANDIN
Namzet Remzî Sarsilmaz jjî, bi bîr xist fêkiyên Wan, Erdîş, Xelat û Bedlîsê hemû ji Hawêlê diçin. Sarsilmaz, anî ziman ku ew ê hewl bidin ku hilberandinê zînde bikin. Sarsilmaz got: "Ji bo vê projeyên me yên cidî hene. Niha li ber malên herkesî bax û baxçe hene. Em ê van bax û baxçeyan biçînin. Em ê bi dirûşmeya ‘Zevî ya te ye. Biçîne, bixwe û bifiroş e' hilberandinê teşwîq bikin." Sarsilmaz, diyar kir ku wexta ew van projeyan pêk bînin, wê rewşa aborî ya navçeyê jî baş bibe û ew ê bi vî awayî nehêlên ku şêniyên navçeyê koç bikin."
OTOGAREKE BIÇÛK
Sarsilmaz, bilêv kir ku li Hawêl kargehên pîşesaziyê yên biçûk belawela ne û ew ê ji bo vê li derveyî navçeyê sîteyeke pîşesaziyê çêbikin û wê hemû kargeh li wir bin. Her wiha Sarsilmaz, anî ziman ku dolmîş û otobês li nav bajêr li nav kolanê rêwiyan digirin û dadixînin û got: "Ji bo çûnhatin rihet bibe, em ê li têketina navêeyê otogareke biçûk ava bikin."
Sarsilmaz, diyar kir ku ew ê xizmeta gelê xwe bikin û got: "HDP, l kuderê be li wir demokrasî û biratî heye. Li Hawêlê mozaîkek heye. Em jî dixwazin li Hawêlê bibin pira navbera reng û dengê cur bi cur."
MA / Omer Akin