STENBOL - Hevberdevkê HDK'ê Sedat Şenoglu, têkildarî tecrîdkirina Rêberê PKK'ê Abdullah Ocalan û pêşniyarên Ocalan ên ji bo çareseriyê axivî û got: "Ocalan ji bo çareseriya qrîza pergalê pêşniyarên giring kirin. “Rojava bi felsefeya Ocalan bi teşe bû. Têkoşîna Ocalan a ji bo aştiyê, li dijî Qrîza kapitalist çareserî ye." 

 

Berdevkê Kongreya Demokratîk a Gelan (HDK) Sedat Şenoglu têkildarî geşedanên 2019'an nirxandin kir û diyar kir ku di sala 2019'an de di navbera bindest û gelên kedkar û navbera serdestan de têkoşînek dijwar pêş ket û wiha got: "Ji ber qrîza heyî hêzên serdest qadên şerê germ ava kirine. Li dijî qrîza heyî Rêberê PKK'ê Abdullah Ocalan li Bakur û Rojhilata Sûriyeyê çareseriya jiyanê pêş xist. Pêşniyarên Ocalan pêş ketin. Ji ber vê yekê divê mirov têkiliya tecrîdkirina Ocalan û êrîşên li dijî Bakur û Rojhilatê Sûriyeyê rast analîz bike. Di sala 2019'an de zextên dijwar li ser HDK'ê pêş ketin. Di sala 2020'an de em ê di nava têkoşîna pêşxistina aştiyê de bin. Aştiya bi rûmet hevî û bendewariya gelan e. Di sala 2019’an de şer bû sedema qrîza aborî. Pergal têk çû. Li dijî pergala mêtîngeriyê, têkoşînek xurt a karker, kedkar û bindestan pêş ket. Qrîza peralê herî zêde di qada aborî de xwe da der. Dîsa qrîza politîk pêş ket. Şerê germ zêde bû. Reqabeta emperyalist şer sor kir û bi rêxistin kir. Di pêşketinên li Rojhilata Navîn de hêzên serdest pêşengî ji şerê 3'emîn ê cîhanê re kir."  

 

‘LÊGERÎNA JIYANEK NÛ' 

 

Şenoglu, destnîşan kir ku li gel qrîza aborî û siyasî, qrîza avhewa û zayendiyê jî pêş ket û wiha lê zêde kir: “Bi hezaran jin hatin qetilkirin. Jin rastî tacîz û tecawizê hatin. Ev qrîz bêtir kûr bû. Di encama hemû qrîzan de emperyalizma kurevî ji bo mirovahiyê bûye tehdîtên pir mezin. Di sala 2019'an de li dijî vê qrîzê di nava gelê cihanê de îtîrazên xurt bilind bûn. li Amarîkaya Latîn, Ewropa, Rojhilata Navîn û gelek cihên din gelên bindest li dijî pergala kapitalist têkoşîn xurt kirin. Ketin nava lêgerîna jiyanek alternatîf. Her ku diçe partiyên nijadperestî û faşîst zêde dibin. Gelên cîhanê li dijî pergala Kapitalist her ku diçe îtîrazên xwe zêde dike. Pergala serdest li cîhanê kaosek mezin ava kiriye. Salên li pêş me, kîjan vîn qrîza pergalî araste bike dê diyar bibe. 

 

'PÊŞNIYARÊN OCALAN ÊN ÇARESERIYÊ Û ROJAVA' 

 

Şenoglu, destnişan kir ku Rêberê PKK'ê Abdullah Ocalan, li dijî qrîzên heyî ji bo çareseriyê pêşniyarên pir xurt pêş xistin û wiha berdewam kir: "Rojava bi felsefeya Ocalan bi teşe bû. Sedema êrîşên li dijî Rojava jî felsefeya Ocalan e. Ji ber ku dijminên perspektifa Birêz Ocalan  a çareseriyê ye van êrîşan zêde dikin. Yên vê dijminantiyê dikin; rejîma tîran, dîktator û nijadperestan e. Ji xwe yên DAIŞ li serê gelê Rojhilata Navîn kirin bela ev hêzên rejîma tîran, nijadperest û dîktator in. Bi taybeti di serdema pêvajoya çareseriyê de têkoşîna Ocalan a ji bo yekîtî û aştiya gelan derket pêş. Mase xera kirin û rê li pêş vê yekê girtin. Li şûna polîtîkayên çareseriyê li Rohilata navîn polîtîkayên şer pêş xistin. Ev nîşan dide ku, pergala Kapîlatist ji bo ku ev têkoşîna Ocalan li pêş wan dibe astengî, ev pêvajo bi dawî kirin. Ocalan tecrîd kirin. Ji ber vê yekê em dibêjin tecrîda Îmraliyê ne tenê tecrîda li Îmraliyê ye. Ev tecrîd, di heman demê de tecrîdkirina Rojhilata Navîn û hemû kedkarên cîhanê ye. 

 

‘YA TECRÎDÊ RAKE TÊKOŞÎNA DEMOKRASIYÊ YE' 

 

Şenoglu, anî ziman ku ji bo tecrîda li Îmraliyê bi dawî bibe divê têkoşîna demokrasiyê li Tirkiyeyê pêş bikeve û wiha lê zêde kir: “Rakirina tecrîdkirina li Îmraliyê, tê wateya çareseriya pirsgireka Kurd a Tirkiyeyê. Ger ku rê li pêş siyaseta demokratîk neyê vekirin, şerê li herêmê dê bêtir kûr bibe. Me dît ku bi hezaran girtî ketin grevê û diyar kirin ku Ocalan vîna çareseriyê ye. Ji ber vê yekê tecdîla li ser Ocalan, nêzîkatiya li hemberî aştiyê ye." 

 

Şenoglu, herî dawî da zanîn ku wan li ser mijarên "Em li ku kêm in? Me li ku mîsyona xwe nelîstiye? Em li ku bi rêxistin nebûn û me xwe bi rêxistin nekir? niqaş meşandin û wiha got: "Li ser vî esasî di kongreyên HDK û HDP'ê de dê li ser van niqaşan pêk bê. Dê bibe kongreyên rexne û rexnedayînê. Ger ku em di vê mijarê de bi ser bikevin em dê karibin aştiya bi rûmet pêş bixin. Em dê li gorî misyon û rola HDP û HDK'ê rexnedayîna xwe bidin. Ger ku em wisa bikin em dê pergala kaosê derbas bikin." 

 

Şenoglu  herî dawî da zanîn ku di sala nû de hevî û bendewariyên gel ji wan pir zêde ye û wiha got: "Em dê di sala nû de bibin bersîva banga gelê xwe. Ji bo em bibin bersîva gelê xwe çi ji destê me bê emê bikin. Ger ku em vê yekê pêk bînin em dê sala 2020'an bi aştiya bi rûmet pêş bixin."