Di demên dawî de li navenda Şirnex, navçeya Cizîr, Silopiya û Bêşebabê bûyerên îstismarê zêde bûne. Hema bêje li hemû navçeyan bi taybetî jî li dibistanan bûyerên îstismarê qewimîn. Li Cizîrê mamsoteyek gelek xwendekarên xwe îstismar kiribûn, li Silopiyayê jî li gelek dibistanan heman tişt qewimîbû û li Bêşebabaê jî cerdevan jî di nav de gelek kesan heman tişt kiriye. 

 

Parlementera HDP'ê ya Şirnexê Nûran Îmîr, ji bo van bûyeran got, bi zanebûnî tên kirin. 

 

‘POLÎTÎKAYÊN RÛXANDINA EHLAQÎ DIDOMIN' 

 

Îmîr, destnîşan kir ku ev bûyerên dijî nirxên ehlaqî bi zanebûnî li herêmê tên kirin, lê belê civakê ew deşîfre kirine. Îmîr, anî ziman ku ji salên 1990'î heya niha hin hêz li herêmê "planên rûxandina ehlaqî" didomînin û got: "A rast di vî warî de devereke ku nikarin lê bi ser bikevin jî Botan e. Çimkî tim û tim tên deşîfrekirin û civak pirsgirêkên bi vî rengî bi qayde û pîvanên xwe yên civakiyî berteref dike." 

 

Îmîr, got: "Bi şer, siyaset, polîtîkayên asîmlasiyonê û pergala perwerdehiyê ya ferzkirî ji bo civakê birizînin gelek tişt kirin lê bi ser neketin. Ev polîtîka nikaribûn nirxên me yên civakiyî tune bikin. Loma jinan û ciwanan hedef digirin û bi rêbazên derehlaqî tev digerin. Her wiha bi vî awayî dixwazin rojevê biguherînin da ku pirsgirêkên sereke yên civakê neyên nîqaşkirin û dîtin. Divê em baş zanibin; ev liv û tevger ne tiştine şexsî ne. Ev ne texmîn in. Berê jî gelek caran pêk hatine û hatine deşîfrekirin. Loma divê em civak baldar bin û hesas bin." 

 

‘HEQ Û HIQÛQ BI JINAN PÊKAN E' 

 

Her wiha Îmîr bal kişand ser pêşniyazpirsên der barê bûyerên îstsimarê yên li dibistanan diqewimin û bersivên ji bo wan tên dayîn. Îmîr, got: "Piraniya pêşniyazpirsên em didin ber meclîsê bêbersiv dimînin. Pêşniyazpirsên lêkolînê jî bêyî ku li naveroka wan bê nerîn, bi dengên AKP-MHP'ê tên redkirin. Bi taybetî jî îqtîdar di mijarên jinan de bersivê nade. An jî ji bo wê tiştekî nakin. Polîtîka hemû bi feraseta mêr hatine çêkirin, loma ji bo çareserkirina pirsgirêkên jinan tiştek nayê kirin û tên paşguhkirin. Lê belê heq û hiqûqa jina tenê bi jina pêkan e." 

 

Îmîr, diyar kir ku ji bo pêşîlêgirtina li îstismar û tecawizê, pêşî divê jin baş pêwendiyê bi hev re deynin û pirsgirêkên der barê jinan de hemûyan deşîfre bikin. Îmîr, got: "Jinên neheqî li wan tên kirin divê heta sûcdar neyên cezakirin mafên xwe yên hiqûqî biparêzin û dev jê bernedin. Em mijarên întiqalî me dikin hemûyan dinirxînin. Em hem di warê hiqûqî de piştgiriyê didin hem jî li meclîsê dikin rojev. Û em wan dişopînin." 

 

Her wiha Îmîr bal kişand ser berteka civakê ya li dijî van bûyerên navbirî û got: "Heta ji destê me bê divê em civakê serwext bikin û vê ferasetê berteref bikin." 

 

MA / Mujdat Can