Yekitiya Êzidiyan a Herêma Efrînê bang li NY’yê, rêxistinên mafên mirovan û CPT’yê kirin ku zorê li Tirkiyeyê bikin û parêzeran bişînin Îmraliyê. Ciwanên PYD’yê jî bi heman daxwazê, ji bo der barê tenduristiya Ocalan de bibin xwedî agahî meşek li dar xistin.

 

ŞEHBA 

 

Di 27’ê Sibatê de şewatek li Girava Îmraliyê derketibû. Şewat rastî bertek û hêrsa gelê Kurd hat. Bertek û nerazibûna gelê Kurd didome. Bi dehan endamên Yekitiya Êzidiyan, endamên saziyên sivîl ên herêma Efrînê li navçeya Ehdas a girêdayî kantona Şehbayê wêneyên Rêberê PKK'ê Abdullah Ocalan rakirin û alên yekitiyê hildan û meşiyan. Nûnerê yekîtiyê li hev kom bûn û daxuyanî dan. Endamên Yekitiya Êzidiyan Arîvan Menan û Esed Marko daxuyanî bi zimanên erebî û kurdî xwend. Daxuyanî wiha ye: "Komploya ku 9’ê Cotmeha 1998’an li dijî rêberê navneteweyî birêz Abdullah Ocalan dest pê kiriye ku bi dîlgirtina wî di 15’ê Sibata 1999’an de bi dawî bûye, tê de dewlet, îstîxbaratên wê, dîplomat , rêxistinên navdewletî bi dewleta Tirkiyê re hevpar bûn, hedef jê jî derbkirina fikra azad a Kurd di şexsê rêber de ku gelê Kurd ji xewa mirinê ya ku mêtingerê Tirk ji dema hilweşîna şoreşa Dêrsimê ya 1938’an de ferz kiriye û fermandarên wê şoreşê di serî de Seyîd Riza bi dar ve kirine, hişyar kiriye. Ji dema dîlgirtina rêber Apo de dewleta Tirk tecrîda girankirî û bimetod li dijî wî ferz kiriye, ew jî bi hedefa negihandina tu perspektîv an jî agahiyên ji rêber Ocalan de, ji ber ku dewleta Tirk girêdana gel biRêbertî re baş dizane. Dewleta Tirk azarên hundirîn û derve dikişîne. Da ku xwe ji wan aloziyan rizgar bike bi gelek kaxizan ku texmîn dike dê wê rizgar bike, dilîze. Ji wan kaxizan jî kaxiza penaberan a şantajkirina Ewropayê ye. Lê belê êdî ewropiyan zanî ku dê penaberên ku dewleta Tirk bişîne, komên terorîst û tundraw in. Ji lew re Ewropayê deriyên xwe li hember penaberan girtin. Her wiha kaxiza herî xeternak ku hikuma AKPA’ê bi kar tîne, rêber Ocalan e. Dewleta Tirk hewl dide bi hestên tirkan bilîze ku dengê kurdan bi rêya zêdekirina tecrîdê li dijî rêberê wan bixeniqîne. Hewldana wê ya dawîn jî şewata bizanebûn ku di 27’ê Sibatê de li girava Îmraliyê rû daye. Da ku bala Tirkan ji ser aloziya aborî dûr bixe.

 

Em wek Yekitiya Êzidiyan a Herêma Efrînê radigihînin ku bi fikra rêber Ocalan ku rêya azadiyê ji me re ronî kiriye, girêdayî ne û dê heta wergirtina agahiya başbûna tenduristiya wî li ser pêyan bin. Yekitiya Êzidiyan li dawiyê bang li NY’yê, rêxistinên mafên mirovan û CPT’yê kir ku fişarê li hikumeta Tirk bikin ku parêzer bi rêber Ocalan re hevdîtinê pêk bînin da ku tenduristiya wî mîsoger bikin." 

 

HESEKÊ 

 

 

Bi sedan Ciwanên PYD’ê jî bi heman armancê meşek li dar xistin. Ciwanên PYD’yê yên herêma Cizîrê di meşê de wêneyên Ocalan hildan û meşiyan. Meş ji gundê Berkevirê ji rojavayê navçeyê 13 km dûr e, dest pê kir. Ciwan di gundên Şeimesor û Quneterayê re derbas bûn. Beşdaran dirûşmên azadiya Ocalan û eşkerekirina tenduristiya wî berz kirin û pankartên "Bi şoreşa ciwantî em ê faşîzmê têk bibin û rêber Apo rizgar bikin" hildan. Dê meşa ciwanan li Qada Şehîdan a navçeya Dirbêsiyê bi dawî bibe. Tê payîn ku bi navê ciwanên PYD’yê Henan Mamed û hevserokatiya PYD’yê de biaxivin.