Kongreya Civaka Demokratîk (KCD), Partiya Herêmên Demokratîk (DBP), Partiya Demokratîk a Gelan (HDP), Kongreya Demokratîk a Gelan (HDK), Tevgera Jinên Azad (TJA), Partiya Azadî, Komeleya Şoreşgerên Demokratîk a Kurd (DDKD), Partiya Însan û Azadî (PÎA), Partîya Komunîsta Kurdistan (KKP), Platforma Demokratên Kurdistanê (PDK-Bakûr) duh li navçeya Sûrê ya Amedê bi şîara “Ji bo azadî, yekîtî, demokrasî” starta Cejna Newrozê dan. Cara yekemîn bi tevlîbûna partiyên kurd ku xebatên yekitiya neteweyî dimeşînin starta Newrozê hat dayîn. Hevserokên giştî yên partiyan têkildarî Newroza ku dê bi rihê yekitiye neeteweyî bê pîrozkirin nirxandinan kirin. 

 

AŞÎTÎ: EM NEÇARIN KU BI HEV RE TEVNIGERIN 

 

Serokê Giştî yê Partiya Azadî Ayetûllah Aşîtî, diyar kir ku dê cara yekemîn dengên cuda yên siyaseta kurd bi awayekî coş Newrozê pêşwazî bikin û wiha got: "Weke tê zanîn her destpêkirinek ji bo ku tendurist bi pêş ve biçe pêwîstiya wê bingeheke baş heye. Em dizanin ku ev rêyeke bi zehmet e. Em bawerin ku ve bingehê daniye. Di hemû partiyên ku nûnertiya kurdan dikin de ev bawerî derketiye holê. Em êdî vê yekê bi awayekî zelal dibînin. Ji bo ku kurd destkeftiyên xwe bi parêzin û bigihîjin statuyek neçarin bi hev re tevbigerin. Ji ber ku Newroz pîroz e li Rojhilata Navîn hemû gel lê xwedî derdikevin. Divê hemû gelê me bi yekitiyeke xurt bê qada ku newroz lê bê pîrozkirin."

 

ÇÎFTYÜREK: LI DIJÎ DESTKEFTIYÊN KURDAN ÊRÎŞ HEYE 

 

Serokê Giştî yê KKP'ê Sînan Çiftyurek, diyar kir ku hem li derveyî welat û hem jî li welat li dijî destkeftiyên kurdan ji aliyê 4 dewletên mêtînkar ve bi tifaqî êrîş hene û wiha got: "Van dewletên metînkar qet nawazin û qebûl nakin ku kurd statû bi dest bixin. Di hedefa wan de Başûr û Rojava hene. Ji bo vê yekê dê her tiştî bikin. Em ê di Newrozê de hem peyam bidin Erdogan û hem jî bidin Esad ku di demên dawîn de ji bo Pirgirêka Kurd stratejiyên xwe guherandine. Beriya ku Erdogan li Moskovê pirsa Esad bike, Esad li Şamê peyam da Erdogan û got ku li Sûriyeyê Pirsgirêka Kurd tuneye. Bi Peymana Moskovê bi awayekî zelal hat dîtin ku Tirkiye û Sûriyeyê pozîsyonên xwe guherandin. Rojeva wan a sereke Rojava ye. Dibe ku Rojava di navbera her du aliyan de bimîne."

 

'MEHE ADARÊ HEM MEHA ŞÎNÊ HEM JÎ MEHA KÊFÊ YE'

 

Di berdewama axaftina xwe de Çîftyurek, bi lêv kir ku Rojava û Başûr sedema hebûna hevin û wiha pêde çû: "Ji bo vê yekê Newroza 2020'an a Bakur ji bo nêzbûna Başûr û Rojava girîng e. Em bang li partiyên siyasî yên li her du aliyan jî dikin ku cudabûna xwe li paş bihêlin û bibin yek. Heke gelê me bi awayekî xurt tevlî Newrozê bibe dê peyameke baş bide Tirkiyeyê. Heke wiha be dê peyama kurd li ser piya ne bigirin û neçar bibin ku me nas bikin. Ji ber vê yekê divê em Newroza 2020'an bi hêz pîroz bikin. Meha adarê ji bo gelê me hem meha şîn û hem jî meha kêfê ye. Em çidikin bikin divê me kêfê derxin pêş û şînan kêm bikin. Hêvî dikim ku gelê kurd êdî di Newrozan de şînan nebîne û Efrîn û Helepçeyan nejî. Em li bendê ne ku em hemû gelê me li qadên Newrozê bin."

 

KAMAÇ: XWEDIYÊ GIRÎNGIYA DÎROKÎ YE 

 

Serokê Giştî yê PÎA'yê Mehmet Kamaç, diyar kir ku her gel bi rojên xwe yên taybet heye û ev tişt anî ziman: "Ev ji bo me kurdan jî derbasdar e. Di dîrokê de cara yekemîne bi daxwaza yekitiya neteweyî banga Newrozê tê kirin. Ji ber vê yekê ev bihevrebûna me jê kurdan ve xwediyê girîngiyeke dîrokî ye. Em bang dikin ku hemû gelê me bi ciwan, jin û extiyaran re li tevahiya Kurdistan û Mersîn, Edene û Stenbolê tevlî pîrozbahiyên Newrozê bibin û aştî û azadiyê bînin ziman." 

MA / Mehmet Şah Oruç