NAVENDA NÛÇEYAN - Sibê 25’ê Mijdarê ye. Jin li gelek navendan derdikevin meydanan û çalakîyan li dar dixin. Jin îro jî daxuyaniyan dan û gazî çalakiyên sibê kirin. 

 

Sibê 25’ê Mijdarê Roja Têkoşîna Dijî Tundiya Li Ser Jinan a Navnetewî ye. Di vê çarçoveyê de îro li gelek navendan jinan li dijî tundiya zilam û dewletê, tacîz, tecawiz, şer û feqîrtiyê çalakiyan li dar xistin û gazî jinan kirin ku sibê beşdarî çalakiyên fînalê bibin. 

 

ÎZMÎR

 

Li Îzmîrê Komîsyona Jinan a Konfedarasyona Sendîkayên Karkerên Şoreşger (DÎSK) meş li dar xistin. Seroka Giştî ya DÎSK’ê Arzû Çerkezoglu û gelek jin beşdarî çalakiyê bûn. Çerkezoglu got ew êdî ji her cûre tundî û kuştina li ser jinan re dibêjin bes e. 

 

Li aliyê din jinên li şaredariyên Bornova, Çigli û Karşiyaka dixebitin jî daxuyanî dan. 

 

EDENE

 

Li Edeneyê jî Şaxa Emekli-Sen a girêdayî DÎSK’ê jî li ber Peykera Aştiyê daxuyanî dan û gotin ew xwedî li jiyana xwe derdikevin. 

Parlamentera HDP’ê ya Edeneyê Tulay Hatimogullari jî axaftinek kurt kir û bal kişand ser têkoşîna jinan. 

 

MÊRDÎN 

 

Meclîsa Jinan a HDP’a Mêrdînê û TJA’yê jî li Mêrdînê ji jinên girtî re kart şandin. Parlamentera HDP’ê ya Mêrdînê Pero Dundar li ber PTT’ê axivî û got ew ê jinên girtî bi tenê nehêlin û xwedî li têkoşîna wan derdikevin. 

 

DERSIM

 

Meclîsa Jinan a HDP’a Dersimê jî li taxa Cumhuriyetê belavok li jinan belav kirin û gazî jinan kirin ku sibê beşdarî daxuyaniya li ber Meydana Seyîd Riza bibin. 

 

Xwendekarên Zanîngeha Munzurê jî li kampusa zanîngehê daxuyanî dan û dovîzên jinên hatine kuştin hildan. Seher Akin li ser navê xwendekaran daxuyanî da û got ew ji cihêkariya li dijî jinan re dibêjin êdî bes e.