STENBOL  - Jin Bi Hev Re Bihêz in bertek nîşanî gefên li Ayşe Acar Başaran a HDP'î hatin xwarin da û got: "Ayşe hevrêya me ye! Em li dijî tahdeya dewleta nêrza bi hev re ne, em bi hev re bihêz in." 

 

Jin Bi Hev Re Bihêz in, têkildarî dorpêçkirina avahiya Navenda Giştî ya Partiya Demokratîk a Gelan (HDP) û gefên li Berdevka Meclîsa Jinan a HDP'ê Ayşe Acar Başaranê hatin xwarin bi nivîskî daxuyaniyek da. Di daxuyaniyê de wiha hat gotin: "Ayşe ya ku polîsan jê re got em ê te bizmar bikin hevrêya me ya têkoşînê ye! Em li dijî tahdeya dewleta nêrza bi hev re ne, em bihev re bihêz in." 

 

Di daxuyaniyê de hat destnîşankirin ku gefên li Ayşe Acar Başaran a HDP'î hatin xwarin gava dawî ya êrişkariya dewleta nêrza ye û wiha hat gotin: "Polîsên desthilata AKP-MHP'ê tahdeya xwe ya li ser jinên ji bo azadiyê têdikoşin zêde dikin. Polîsên ku herî dawî di 8'ê Adarê de êriş biribûn ser jinan û di 1'ê Gulanê de mil şikandibûn û li Îzmîrê gaz û cop bi kar anîbûn, niha êrişî HDP'iyan û hevalên me yên ji tevgera jinan a kurd dikin û gefan dixwin." 

 

‘EM BI HEV RE LI BER XWE DIDIN'

 

Di daxuyaniyê de hat diyarkirin ku Ayşe Acara Başaran hevrêya wan têkoşînê ye û wiha hat gotin: "Di çalakiyên me yên ji bo Peymana Stenbolê û xwedîderketina li mafê nafakayê de, di 8'ê Adarê de, di meşên şevê yên feminîst de, di 25'ê Mijdaran de me û Ayşe Acar Başaran bi hev re li ber xwe da." 

 

‘EM POLÎS NAS DIKIN'

 

Di daxuyaniyê de hat diyarkirin ku ew ê bersiva polîsê ku ji Başaranê re gotiye "tu kî yî" bidin û wiha hat gotin: "Em ji polîs re nabêjin tu kî yî. Ji lew re em polîs nas dikin: em wî ji ji taciz û tecawizên di dema binçavkirinê de, di avêtinên ser malan de, wî ji ji helwesta wî ya ji bo kujerê Denîz Poyrazê nas dikin." 

 

Di dawiya daxuyaniyê de hat bilêvkirin ku dê di warê hiqûqî de şopdarê vê gefa polîsan bin û wiha hat gotin:" Em li ber tahdeya dewleta nêrza bêdeng namînin, em serî natewînin."