NAVENDA NÛÇEYAN - MKG’ê rapora xwe ya meha Mijdarê eşkere kir. MKG’ê diyar kir ku derheqê 7 rojnamegeran de lêpirsîn hate destpêkirin, derheqê 7’an de doz hate verkirin, 38 rojnameger hatin darizandin û li 7 rojnamegeran bi giştî 2 sal û 3 meh cezayê hefsê hate birîn.
Komeleya Rojnamegerên Jin a Mezopotamyayê (MKG) “Rapora Binpêkirinên Mafên Rojnamegerên Jin” a meha Mijdarê eşkere kir. Di beşa nirxandinê ya raporê de hate gotin ku zextên li ser çapemeniya azad û rojnamegerên jin roj bi roj zêde dibin, rojnameger dema ku pîşeya xwe dikin, ne tenê bi binpêkirina azadiya ramanê re rû bi rû dimînin, di heman demê de bi cudakariya zayendî, tundî û gefan re rû bi rû dimînin. Hat gotin ku ev zext hem azadiya pîşeyî ya rojnamegeran û hem jî mafê gel a xwe gihandina agahiyên rast dixe xeterê.
‘DI DEMA BINÇAVKIRINÊ DE ROJNAMEGER HATIN DERBKIRIN’
Di berdewamiya daxuyaniyê de wiha hate gotin: “Binçavkirin, serdegirtina malan, gefxwarin, muameleya xerab û hewldanên sansurê yên li dijî rojnamegeran di Mijdara 2024’an de gelekî zêde bûne. Bi taybetî du serdegirtina mala nûçegihana JINNEWS’ê Derya Ren a li Semsûrê, lêdana polîsan a nûçegihana JINNEWS’ê Pelşîn Çetînkaya ya li Êlihê dema nûçe dişopand û li Stenbolê Hîlal Koylû bi darê zorê dest ji karê xwe berda, ev mînakên şênber ên herî berbiçav in.
Di vê pêvajoyê de Seroka Komeleya Rojnamegerên Jin a Mezopotamyayê Roza Metîna jî di 26'ê Mijdarê de hatibû binçavkirin. Di serdegirtina malan de her wiha rojnameger Tûgçe Yilmaz, Suzan Demîr, Havîn Derya, Berfîn Atli û Serap Guneş jî hatin binçavkirin. Ev operasyonên li dijî rojnamegeran ne tenê xebatên wan ên pîşeyî dike hedef, di heman demê de êrişek li dijî têkoşîna jinên rojnameger a ji bo hebûna jiyana civakî ye.”
‘DIVÊ ÊRIŞ TAVILÊ BÊN RAWESTANDIN’
Di berdewama raporê de wiha hate gotin: “Hedefgirtina rojnamegeran êrişeke zayendî ye û armanc jî ew e ku jinan ji jiyana civakî dûr bixin. Tundiya fîzîkî û psîkolojîk, gef û zextên darazê yên ku li ser rojnamegeran tên kirin, bi cudakariya zayendî re jî her ku diçe kûrtir dibe. Ev hawirdora zextê ya li dijî çapemeniya azad armanc dike ku dengê rojnamegeran bibire û rê nede ku heqîqet di civakê de were ragihandin. Pêwîst e demildest ev binpêkirin bên rawestandin, rojnameger karibin bi ewlekarî pîşeya xwe bikin û ji bo wekheviya zayendî pêk were gav bên avêtin. Divê kiryarên şîdeta fîzîkî û psîkolojîk ên li hemberî rojnamegeran bên darizandin û hemû pêkanînên ku azadiya çapemeniyê asteng dikin bên rawestandin.
BANGA PIŞTEVANIYÊ
Weke Komeleya Rojnamegerên Jin ên Mezopotamyayê em careke din tekez dikin ku em ê li kêleka rojnamegerên li dijî zextan li ber xwe didin bibin. Dengê rojnamegeran nayê qutkirin; ronahiya rastiyê tu carî nayê tarî kirin. Em bang li raya giştî dikin ku piştgiriyê bidin rojnamegerên jin û Çapemeniya Azad a Kurd.”
BIPNÊKIRINÊN LI DIJÎ ROJNAMEGERAN
Di raporê de binpêkirinên li dijî rojnamegeran wiha hatin rêzkirin:
“* Rojnamegerên êriş li wan hatine kirin: 3
* Rojnamegerên bi ser mala wan de hat girtin: 8
* Rojnamegerên hatin binçavkirin: 9
* Rojnamegerên mûameleya ne baş li wan hat kirin: 4
* Rojnamegerên gef li wan hat xwarin: 5
* Rojnamegerên şopandina wan a nûçeyan hat astengkirin: 3
BINPÊKIRINÊN AZADIYA RAMAN
* Rojnamegerên der barê wan de lêpirsîn hat destpêkirin: 7
* Rojnamegerên der barê wan de doz hat vekirin: 7
* Rojnamegerên darizandina wan dewam dikin: Di 14 dosyeyan de 38 rojnameger hatin darizandin
* Hejmara rojnamegerên girtî (Ji 4'ê Çileya 2023'yan heta niha): 5
ASTENGKIRINA PLATFORMÊN ÎNTERNET-MEDYAYA DIJÎTAL
* Malperên hatine girtin: 1
* Nûçeyên hatine astengkirin: 6
* Naverokên Medyaya Dîjîtal ên hatine astengkirin: 3
LÎSTEYA ROJNAMEGERÊN JIN ÊN GIRTÎ
* Lutfiye Burcu Kara - Rojnameya Yekitiya Têkoşînê
* Elîf Ersoy - Berpirsiyara Karên Nivîsê ya Kovara Yuruyuşê
* Hatîce Duman - Midûra Karên Nivîsan û Xwediyê Rojnameya Atilimê
* Selamet Turan - Rojnameger
* Ozden Kinik - Xebatkara TRT'ê