Êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê didomin. Rojnameger Nazim Daştan û Cîhan Bîlgîn ku geşedanên li herêmê dişopandin, di 19’ê Kanûnê de li ser rêya di navbera Bendava Tişrîn û bajarokê Sirînê de ji hêla dewleta tirk ve bi SÎHA’yan hatin qetilkirin. 

 

Rojnameger Argeş Viyan, têkildarî êrişan, berxwedana li dijî êrişan û helwesta hêzên navneteweyî ji ajansa me re axivî. 

 

HEDEF KOBANÊ YE

 

Viyan, anî ziman ku rêveberiya Şamê beriya li hemberî Heyet Tehrîr el Şamê (HTŞ) li ber xwe bide eniyên xwe terikandiye û wiha got: “Lê belê li taxên Eşrefiye û Şêx Meqsûd ên Helebê berxwedan didome. Ji ber êrişên bertirê, xelkê ji Efrînê koçî Til Rifetê kiribû ji neçarî xwe ji wir jî vekişand. Gelek kesan xwe spartin herêmên Rêveberiya Xweser. Îktîdara faşîst a AKP-MHP’ê bi aweyekî hemwext li gel hilweşîna rejîmê re êrişî herêmên Kurdan kir. Hedefa van êrişan jî dagirkirina Kobanê ye ku sembola berxwedana gelê Kurd e. Lê belê li hemberî gel û berxwedana hêzên wan ev plan vala derket.” 

 

BÊDENGIYA NAVNETEWEYÎ

 

Bi domdarî Viyan destnîşan kir ku tevî nîqaşên agirbestê yên bi destê Koalîsyona Navneteweyî tên meşandin jî, hêzên navneteweyî li hemberî êrişan xwe li nedîtiyê didin û ev tişt anî ziman: “Koalîsyona navneteweyî ya bi pêşengtiya DYA’yê, bi vê bêdengiya xwe bi eşkereyî piştgiriyê didin vê rewşê. Gel jî ji ber vê rewşê gelek aciz e. Divê DYA ji bo pêşîlêgirtina van êrişên Tirkiyeyê bikeve nava tevgerê. Lê heta niha jî di vê mijarê de tu gav neavêtiye. Rêveberiya Xweser gelek caran got ku tu hewldanên wan ên ji bo êrişkirina Tirkiyeyê nînin û piştgiriyê didin cîrantiya baş. Tevî vê jî êriş didomin.” 

 

'SÛCÊ ŞER DIKE’

 

Di berdewamê de Viyan anî ziman ku dewleta tirk di êrişên xwe de sivîlan, rojnamegeran û jîngehan hedef digire û wiha dirêjî da axaftina xwe: “Êrişên ser rojnamegeran her ku diçe zêdetir dibin. Herî dawî jî hevalên me Nazim Daştan û Cîhan Bîlgîn bi SÎHA’yan hatin qetilkirin. Ev rewş, asta êrişên ser Çapemeniya Azad nîşan dide. Divê saziyên navneteweyî bertekê nîşanî van êrişan bidin. Hedefgirtina rojnamegeran, bi eşkereyî sûcê şer dikin. Komên girêdayî dewleta tirk tu pîvanên exlaqî nas nakin, ev yek di êrişên wan de eşkere dibe. Êriş piranî li ser herêmên Tişrîn û Qereqozaqê ne. Tevî ewqas teknîkê jî hêj jî ev herêm di destê Rêveberiya Xweser de ye. Hêzên berxwedanê amadekariyên xurt kirine û bersivê didin van êrişan. Gelê Kurd û dostên wan, ji bo parastina statûya Bakur û Rojhilatê Sûriyeyê bi berpirsyartiyeke mezin radibin. Heta ku ev êriş bi dawî dibin û statûya herêmê tê misogerkirin jî dê ev têkoşîn bidome. Modêla Rêveberiya Xweser, aramî û hizûrê dide xelkê herêmê lê belê çeteyan bi êrişên xwe ev rewş tune kirin. Berxwedana îro ne tenê ji bo gelên herêmê, ji bo pêşeroja Rojhilata Navîn jî pir girîng e.” 

 

'ÇARESERÎ BIDAWÎKIRINA TECRÎDÊ YE’

 

Viyan, diyar kir ku pêşeroja gelên herêmê girêdayî berxwedana li qadê ye û axaftina xwe wiha qedand: “Divê her çar parçeyên Kurdistanê li dijî êrişên ser Bakur û Rojhilatê Sûriyeyê bi hev re têbikoşin. Çareseriya demokratîk a pirsgirêka Kurd, bi bidawîkirina tecrîda girankirî ya li ser Rêber Abdullah Ocalan pêkan e. Tecrîd, êrişeke li dijî vîna gelê Kurd e. êrişên li ser qadên sivîlan zêde bûne. Herî dawî jî embarên genim hedef hatin girtin. 300 hezar tonên genim hatin şewitandin. Ji bo bidawîbûna van êrişan, hewcehî bi yekitiya neteweyî û ruhekî neteweyî heye.” 

 

MA / Delal Akyuz