NÎGDE - Li navçeya Borê ya Nîgdeyê karkerê Kurd ê bi navê Orhan Îdîlkurt di êrişa çekdarî de bi giranî birîndar bû. Hat zanîn ku Şaredarê MHP’î di dema amadekirina girtenameyê de mudaxile kiriye da ku li şûna demanceya rast “demanceya hişkeber" were nivîsandin.
Li bajarokê Çukurkuyu yê girêdayî navçeya Borê ya Nîgdeyê, 24 karkerên demsalî yên Kurd ku ji navçeya Sêwreg a Rihayê çûbûn û di zeviya bacanan de dixebitîn, rastî êrişa xwediyê zeviyê û xizmên wî hatin. Li gorî agahiyên karkeran dane; TIR’a barkirî dema di heriyê de dimîne bangî xwediyê zeviyê Cemal Ozer dikin ku bi motora xwe TIR’ê ji heriyê derbixe. Ozer ê tê cem TIR'ê, heqaretan li karkeran dike. Li ser vê yekê karkeran jî dev ji zeviyê berdan û xwestin derbasî konên xwe bibin.
Hat destnîşankirin ku piştî vê yekê, komeke ji 150 kesan pêk dihat ku Ozer û xizmên wî bûn, rêya karkeran girtin, heqaret li wan kirin û nehiştin karker ji nava zeviyê biçin. Piştî gengeşiyê, Ozer û xizmên wî bi ço û çekan êrişî karkeran kirin.
CENDIRME Û AMBULANS NEHATIN ŞANDIN
Karkerê bi navê Orhan Îdîlkurt, di erişa bi çekê ya Ozer de bi giranî birîndar bû. Karkeran, diyar kirin ku cendirme û ambulans agahdar kirine lê bi hewara wan nehatine û bi wesayîtên xwe ji cihê bûyerê dûr ketine. Herwiha karkeran ragihand ku piştî ji cihê bûyerê dûr ketin, ambûlans çûye û birîndarên wan rakirine nexweşxaneyê.
ŞAREDARÊ MHP'Î MUDAXILEYÎ GIRTENAMEYÊ KIR
Der heqê bûyerê de lêpirsîn hate destpêkirin. Hate zanîn ku Şaredarê Bajarokê Çukurkuyuyê yê MHP'î Ahmet Halîsdemîr, di dema nivîsîndina girtenameyê de mudaxile kir da ku di girtenameyê de li şûna demanceyê peyva "demanceya hişkeber (Kuru sıkı)" were nivîsandin. Ji ber êrişê, xwediyê zeviyê Cemal Ozer hate binçkavkirin.
Orhan Îdîlkurt ê ku di êrişê de bi giranî birîndar bûbû, li beşa lezgîn a nexweşxaneyê tê dermankirin.
MA / Sema Bîngol