WAN - Sergardiyanê Girtîgeha Hejmar 1 a bi Ewlekariya Bilind a Dumluyê êrişî girtiyan kir. 

 

Binpêkirinên li girtîgehan her ku diçe zêdetir dibin. Hat zanîn ku mehek berê sergardiyanê Girtîgeha Hejmar 1 a bi Ewlekariya Bilind a Dumlu ya Erziromê gefa “Hûn ê bibînin ez ê çi bi serê we bînim” li girtiyan xwar. Hat ragihandin ku piştî vê gefê, sergardiyanî êrişî girtiyan kir. Ji girtiyan Sînan Karer ku rastî êrişê hatibû, têkildarî êrişê li ser telefonê agahî da malbata xwe. 

 

Hat gotin ku sergardiyanê gef li girtiyan xwaribû di roja nobeta xwe de bi awayekî fîzîkî êrişî 3 girtiyan kir. Girtiyan jî bertek nîşan dan û ji bo protestokirina êrişê tev li tu aktîvîteyên girtîgehê nebûn. 

 

Karer, da zanîn ku êriş di 26’ê Tebaxê de hate kirin û ji wê rojê heta niha tev li tu aktîvîteyan nayên kirin. Karer, got ku sergardiyanê nû li girtîgehê hatiye tayînkirin nebaş tevdigere û mehek berê gefa “Hûn ê bibînin ka ez ê çi bi serê we bînim” xwariye û piştî vê gefê jî êriş kiriye. 

 

Karer, têkildarî tiştên li girtîgehê qewimîn û sepanên rêveberiya girtîgehê banga hestiyariyê li raya giştî kir û got ku dê protestoyên wan bidomin.