NAVENDA NÛÇEYAN - Înîsiyatîfa ji bo Girtiyên Nexweş Azadî û Komîsyona Girtîgehan a Şaxa ÎHD’a Stenbolê xwestin ku girtiyên nexweş Emîn Aladag û Kemal Gomî bên berdan. 

 

Komîsyona Girtîgehan a Şaxa Komeleya Mafên Mirovan (ÎHD) a Stenbolê û Înîsiyatîfa ji bo Girtiyên Nexweş Azadî di daxuyaniyên xwe yên li Stenbol û Enqereyê de bal kişandin ser rewşa girtiyên nexweş. 

 

STENBOL 

 

Komîsyona Girtîgehan a Şaxa ÎHD’a Stenbolê her hefteyê çalakiya “Rûniştina F’yê” li dar dixe. Çalakî di hefteya 622’yan de li pêşiya avahiya komeleyê ya li Beyoglûyê hat lidarxistin. Di çalakiya vê hefteyê de beşdaran bal kişandin ser rewşa girtiyê nexweş ê 55 salî Kemal Gomî ku 32 sal in girtî ye û nexweşê “Rezîduel Şîzofrenî” ye. Di çalakiyê de pankartên “Bila girtiyên nexweş bên berdan” û “Tedawî maf e nabe ku bê astengkirin” hatin vekirin, wêneyên girtiyên nexweş hatin hilgirtin û gelek caran dirûşmên “Mirov bi mafên xwe mirov e” û “Tedawî mafe nabe ku bê astengkirin” hatin berzkirin. 

 

‘ÎDRAQ NAKE KU DI GIRTÎGEHÊ DE DIMÎNE’ 

 

Rêvebera ÎHD’ê Mukaddes Şamîologlû daxuyanî xwend û got ku bi girtîgehên tîpên S û Y’ê re tecrîd êdî sîstematîk bûye. Piştre jî Şamîloglû têkildarî rewşa tenduristiyê ya Kemal Gomî ev agahî parve kir: “Gomî, nexweşê nexweşiya ‘Rezîduel Şîzofreniyê’ ye. Îdraq nake ku cihê lê dimîne girtîgeh e û nikare pêdiviyên xwe bi cih bîne. Ev rewş bi raporê ATK’ê hatiye teyîdkirin. Ji 1993’yan ve girtî ye. Ji ber cezayê muebbeta giran, salên dûvdirêj di hucreya yekkesî de hat ragirtin. Nexweşiya wî li girtîgehê pêş ket. Gelek caran li serwîsa Psîkyatriyê ya Nexweşxaneya Dewletê ya Kocaeliyê û Nexweşxaneya Ruh û Rehikan a Bakirkoyê hat razandin. ATK’ê di sala 2010’an de teşhîsa ‘Rezîduel Şîzofreniyê’ kir û got ku nexweşiyeke mayînde ye û diyar kir ku dikare ji hêla serokkomar ve bê efûkirin.” 

 

‘LI SER EWLEHIYA CAN TALÛKEYEKE MEZIN E’

 

Şamîloglû, got ku divê Gomî were berdan û ev tişt anî ziman: “DMME û ATK her tim dibêjin ku dikare bi efûya serokkomar were berdan lê hêj jî girtî ye. Ev yek xetereyeke mezin li ser jiyana Gomî çêdike. Banga me ji bo rayedaran ew e ku ji bo parastina jiyana Gomî û hemû girtiyên nexweş berpirsyartî tevbigerin û banga hestiyariyê li raya giştî dikin.” 

 

ENQERE 

 

Endamên Înîsiyatîfa ji bo Girtiyên Nexweş Azadî jî di hefteya 494’an de li pêşiya avahiya Şaxa ÎHD’a Enqereyê daxuyanî dan. Di daxuyaniyê de pankarta “Bila girtiyên nexweş bên berdan” hate vekirin. 

 

Daxuyanî ji hêla endama Lijneya Rêveberiya Navendî (MYK) a ÎHD’ê Nûray Çevîrmen ve hate xwendn. Çevîrmen, got ku gelek girtiyên nexweş hene ku nikarin bi tena serê xwe sexbêra xwe bikin. 

 

‘HEKE TEVDÎR BÊN GIRTIN DIKARE RÊ LI BER MIRINAN WERE GIRTIN’ 

 

Çevîrmen, bi domdarî rewşa tenduristiyê ya girtiyê nexweş Emîn Aladag ku li Girtîgeha Hejmar 1 a Xarpêtê tê ragirtin vegot. Çevîrmen, da zanîn ku Aladag di 1993’yan de hate binçavkirin û ji ber îşkenceyê rehikên destê wî yê rastê û lingê wî yê çepê qetiyane. Çevîrmen, wiha domand: “Di sala 1998’an de hate berdan lê piştî cezayê wî yê muebbetê hatî erêkirin, di 2000’î de dîsa hate girtin û birin Girtîgeha Wanê. Emeliyatên wî dereng hatin kirin û demekî dirêj dermanên êşbirê tedawî dît. Serlêdanên ji bo domandina tedawiyê li derve hatin redkirin û rewşa wî girantir bû.” 

 

Çevîrmen, piştre jî nexweşiyên Aladag vegot û da zanîn ku bi alîkariya hevalên xwe dijî. Çevîrmen xwest ku Aladag di zûtirin demê de were berdan.