Yekitiya Ragihandina Azad (YRA) û Yekitiya Ragihandina Jin (YRJ) têkildarî rojnameger Nazim Daştan û Cîhan Bîlgîn ku dema geşedanên li Bakur û Rojhilatê Sûriyeyê dişopandin di encama êrişa bi SÎHA’yan a dewleta tirk de hatibûn qetilkirin, li pêşiya Navenda Çandê ya Mihemed Şêxo ya Qamişloyê daxuyanî dan. Gelek rojnameger tev li daxuyaniyê bûn. Di daxuyaniyê de rojnamegeran wêneyên Nazim Daştan û Cîhan Bîlgînê û pankarta “Şehîdên Çapemeniyê Azad namirin” hilgirtin. 

 

Metna daxuyaniyê ya bi Kurdî ji hêla pêşkeşvanê Ronahî TV’yê Alan Meîş û ya bi erebî jî ji hêla Arîn Denîz ve hate xwendin. 

 

Di daxuyaniyê de wiha hate gotin: 

 

“Ji 8’ê Kanûnê (2024) ve dewleta Tirkiye ya dagirker û komên çete yên girêdayî wê êrişên xwe yên li ser herêmên Bakur û Rojhilatê Sûriyeyê zêde kirine. Di demeke ku hemû cîhan li ser avakirina sîstemek nû ya li Sûriyeyê ku hemû pêkhate tê de werin temsîlkirin, nîqaş dikin de, Çapemeniya Azad hewl dide vê rastiyê ji raya giştî re ragihîne.  

 

Hevrêyên me yên rojnamevan, ji bo pêkanîna vê erka xwe ya exlaqî û dîrokî, li hemû eniyên ku êriş li ser hene, bê dudilî kar dimeşînin, êrişên dagirkeriyê yên dewleta Tirkiyê ji gel û raya giştî ya cîhanê re radigihînin.

 

Dewleta Tirkiyeyê bi van êrişên xwe tevahî nirxên civaka me hedef digire, her wiha ragihandina ku rastiya wan aşkera dike jî xisteya pêşiya êrişên xwe. Li gorî hemû peymanên navnetewî mafê rojnamevanan ê şopandina şer û pevçûnan heye û divê neyên hedefgirtin. Lê dewleta Tirkiye li hemberî Çapemeniya Azad şerekî hovane dimeşîne.

 

Weke eniyeke bi bandor a têkoşînê, Çapemeniya Azad di rêwîtiya xwe ya heqîqetê û aşkerakirina rastiyan de bedelên giranbûha dane.

 

Herî dawî, di encama êrişeke hovane ya dewleta Tirk a dagirker de du hevalên me yên rojnamevan şehîd bûn. Di vê êrişa nemerdane de hevalên me yên rojnamevan Nazim Daştan û nûçegihana Ajansa Nûçeyan a Hawar (ANHA) Cîhan Bîlgîn şehîd bûn.  

 

Herdu hevalên me ji roja destpêkê ya êrişên ku li ser Bendava Tişrîn û Pira Qereqozaqê têm domkirin ve, berxwedaniya li herêmê di şopandin.

 

Roja 19’yê Kanûna 2024’an jî dema karê xwe yê rojnamevaniyê dimeşandin, saet di 15:20’an de, li ser rêya di navbera Bendava Tişrînê û bajaroka Sirînê de wesayîta wan ji aliyê balefireke bê mirov û biçek a dewleta Tirkiyeyê ve hat bombebarankirin. Di encama êrişê de her du hevalên me şehîd bûn, ajarokarê wesayîtê Ezîz Hec Bozan jî birîndar bû.  

 

JIYANEKE BI TÊKOŞÎNÊ DERBAS BÛYÎ

 

Hevala me Cîhan Bîlgîn, ji sala 2017’an ve li rojavayê Kurdistanê rojnamevaniyê dike. Heval Cîhan Bîlgîn di malbeteke welatpêrêz a bedeldayî de mezin bûye.  Ji bo ku berxwedan û Şoreşa Rojava ji raya giştî re ragihîne, weke rojnamevanek wêrek di eniya herî pêş ya Çapemeniya Azad de cîh girt. Bi pênûs û kameraya xwe, her tim bû zimanê şoreşa gelan û şoreşa jinan. Cîhan Bîlgîn 8 salan di ANHA’yê de weke nûçegihan xebat kir. Di pêvajoya avakirina Şoreşa Rojava de, weke rojnamevanekê 8 salên tije têkoşîn derbas kirin. Di demên ku êrişên dewleta Tirkiyeyê li ser Rojava dijwar dibûn de, ji bo ku rastiyan bi awayekî herî baş ragihîne, her dem li eniya herî pêş bû. Dîsa di pêvajoya avakirina pergala xweseriya demokratîk a li herêmê de weke jineke lêgerinvana azadiyê, bi nûçe, dosya û hevpeyvînên xwe Şoreşa Rojava ku şoreşa jinê ye, ji raya giştî re ragihand. Di rêwîtiya domdar a Çapemeniya Azad de, weke şopdara kevneşopiya Gurbetelî Ersoz, Gulistan Tara, Seyîd Evran, Dilîşan Îbiş û bi sedan şehîdên ragihandinê, bi azweriyeke mezin Şoreşa Rojava ji raya giştî ya Kurdistanê û cîhanê re ragihand. Cîhan Bîlgîn bi qasî pisporiya xwe ya rojnamevaniyê, bi rûkenî û bi hevaltiya xwe jî kesayeteke mînak bû.    

 

LI HEMÛ QADÊN BERXWEDANÊ CIH GIRT

 

Têkoşer û rojnemevan Nazim Daştan, li navçeya Giyadîn a bajarê Agiriyê ya bakurê Kurdistanê ji dayik bû. Di malbateke welatparêz de mezin bûye. Bi vê zanebûna netewî, di temenekî ciwan de, di eniya ragihandinê de dibe lêgerînvan û têkoşerê azadiyê. Di sala 2014’an di pêvajoyeke ku êrişên DAIŞ’ê li ser Rojava destpê kirin de, derbasî Rojava bû. Destpêkê li Efrînê, piştre jî li Kobanê berxwedana dîrokî şopand û ji cîhanê re ragihand. Di pêvajoya berxwedana Rêveberiya Xweser a li bakurê Kurdistanê de derbasî navçeya Silopiya ya Şirnexê bû û erka rojnamevaniyê li wir domand. Lê dewleta Tirk ji ber karê wî yê rojnamevaniyê, der barê wî de lêpirsîn da destpêkirin. Tevî zextan jî hevalê Nazim dest ji karê rojnamevaniyê berneda û sala 2016’an careke din derbasî rojavayê Kurdistanê bû. Di salên dirêj ên têkoşîna rojnamevaniyê de, li Efrîn, Kobanê, Reqa, Girê Spî, Şengal û başûrê Kurdistanê erka rojnamevaniyê bi layîqî pêk anî. Herî dawiyê jî berxwedana Bendava Tişrînê ya li dijî êrişên dagirkeriyê dişopand.

 

Hevalê me Nazim bi kesayata xwe ya dilnizm, kedkar û bîrewer di eniya herî pêş ya Çapemeniya Azad de cîh girt. Li her cihekî ku têkoşîna dijwar lê hebû, hevrêyê me Nazim Daştan bi kamera û penûsa xwe li wir bû. Weke şopdarekî Xelîl Dag, bi pênûs û kameraya xwe bûye zimanê heqîqetê. Weke rojnamevanek wêrek di rêwîtiya dijwar û demdirêj a çapemeniyê de ji bo gelek sazî û dezgahehên Çapemeniya Azad xebat meşandin.  

 

Em vê êrişa hovane ya li hemberî herdu hevalên me yên rojnamevan bi tundî şermezar dikin. Weke şopdarên heqîqetê em ê bi bîryardariyeke mezin rêya wan bişopînin, pênûs û kamerayên wan li erdê nehêlîn. Em bang li hemû rojnevamanan dikin ku bibin alîgirên rastiyê û bibin şopdarên Çapeniya Azad ku îro di oxira wê de Nazim Daştan û Cîhan Bîlgîn şehîd bûn. Her wiha em bang li sazî û rêxistinên rojnamevanan, dîsa saziyên mafên mirovan ên navneteweyî dikin ku li hemberî vê hovîtiyê denge xwe bilind bikin.

 

Weke Çapemeniya Azad em soz û biryardariya xwe ya mezinkirina têkoşîna hevrê Nazim Daştan, Cîhan Bîlgîn û hemû şehîdên ragihandinê nû dikin.”

 

Daxuyanî, bi dirûşma “Şehîd namirin” bi dawî bû.