NAVENDA NÛÇEYAN - Navenda Ragihandin û Çapemeniyê ya HPG'ê ragihand ku tevî biryara agirbestê jî Tirkiyeyê di meha Adarê de 11 hezar û 585 caran êrişî wan kiriye. 

 

Ajansa Nûçeyan a Firatê (ANF), daxuyaniya Navenda Ragihand û Çapemeniyê ya HPG'ê ya têkildarî bilançoya meha Adarê parve kir. Daxuyaniya HPG'ê bi vî rengî ye:

 

"Partiya me PKK'ê li ser bingeha banga dîrokî ya Rêber Apo di 1'ê Adara 2025'an de agirbest ragihand. Fermandariya me ya Biryargeha Navenda Parastina Gel heman rojê ferman da hemû hêzên me yên bingehîn, tîmên fedaî yên bi taybet hatine wezîfedarkirin, yekîneyên xweser û xweparastinê yên li Tirkiye û Bakurê Kurdistanê ku li gorî biryara agirbestê tevbigerin. Hêzên me hemûyan li gorî vê fermana Partiya me û Fermandariya me nêzîkatî nîşan dan û bi vî rengî tevgeriyan.

 

Meha Adarê di heman demê de li meha Remezanê rast hat ku ji bo alema Îslamê pîroz e. Li gel pozîsyona agirbestê ya hêzên me û biryara partiya me jî dewleta Tirk a qirker mêtinger û hikumeta AKP'ê ya faşîst di nava vê mehê de êrîşên xwe yên li ser Bakurê Kurdistanê û Herêmên Parastinê yên Medyayê dewam kirin. Artêşa Tirk a dagirker meha Adarê 11 caran bi çekên kîmyewî, 9 caran bi çekên qedexekirî û 9 caran jî bi droneyên bombebarkirî êrîş bir ser tunelên me yên şer ên li Herêmên Parastinê yên Medyayê. Di heman demê de qadên berxwedanê 169 caran bi balafirên şer, 98 caran bi helîkopterên êrîşê û 11289 caran jî bi çekên giran, top û obusan hatin bombekirin.

 

Gerîlayên Azadiyê yên Kurdistanê jî li ser bingeha parastina rewa li dijî êrîşên dagirkeran 13 caran destwerdan kirin û êrîşên ji bo îmhakirinê beralî kirin. Di heman demê de SÎHA'yeke bi tîpa Akinci ya dewleta Tirk ku ji bo keşif û êrîşê tevdigeriya, di 16'ê Adara 2025'an de li ezmanên Qendîlê li bilindahiya bi 9645 metreyî ji aliyê hêzên me yên Parastina Hewayî yên Şehîd Delal ve hate xistin.

 

Dema ku mirov bala xwe bidin ser êrîşên ku artêşa Tirk di nava vê pêvajoya agirbestê ya mehekê de kiriye, tê dîtin ku hêza van êrîşan dike naxwaze şer biqede, dixwaze şer dewam bike. Eger ne bi vî rengî bûya, li dijî hêzeke ku di pozîsyona agirbestê de ye ewqasî ji hewayî û bejahî êrîş nedihat kirin. Ev yek jî radixe pêş çavan ku rewş û israrek heye ku naxwaze şer bi dawî bibe, dixwaze şer dewam bike.

 

Bîlançoya şer a meha Adarê bi berfirehî bi vî rengî ye:

 

Êrişên bi balafirên şer: 169

 

Êrişên bi helîkopterên êrîşê: 98

 

Êrişên bi çekên kîmyewî: 11

 

Êrişên bi droneyên bombebarkirî: 9

 

Êrişên bi teqemeniyên qedexekirî: 9

 

Êrişên bi çekên giran, top û obusan: 11289

 

Destwerdana li êrişan: 13"