STENBOL - Dayikên Şemiyê ku li aqûbeta Huseyîn Taşkaya yê ku 32 sal berê di dema binçavkirinê de hat windakirin pirsîn, destnîşan kirin ku ew ê dev ji daxwaza edaletê bernedin.
Dayikên/Mirovên Şemiyê ku 1080'emîn çalakiya xwe li dar xistin, li aqûbeta xizmên xwe yên ku di binçavan de hatine windakirin pirsin û xwestin kiryar bên darizandin. Dayikên Şemiyê li Qada Galatasarayê bi qurnefîl û wêneyên xizmên xwe yên ku di binçavan de hatin windakirin kom bûn. Di çalakiya vê hefteyê de li aqûbeta Huseyin Taşkaya ku 32 sal berê li navçeya Sêwereg a Rihayê hatibû binçavkirin û careke din jê agahî nehatibû girtin, hat pirsin.
Daxuyaniya çapemeniyê ji hêla Endama Lijneya Rêveberiya Navendî (MYK) ya Komeleya Mafên Mirovan (ÎHD) Eren Keskîn ve hat xwendin.
POLÎTÎKAYA DEWLETÊ
Eren Keskînê diyar kir ku windakirinên bi zorê polîtîkayeke dewletê ye li Tirkiyeyê û di encamê de, qet lêpirsîneke bi bandor nehatiye kirin da ku çarenûsa windayan were eşkerekirin û sûcdar werin cezakirin. Eren Keskînê destnîşan kir ku malbatên windayan bi polîtîkayeke sîstematîk a înkar û bêcezatiyê re rû bi rû hatine hiştin û got ku dewlet bi veşartina agahiyên li ser çarenûsa windayan îşkenceyê li wan dike.
Eren Keskînê diyar kir ku ew ji bo pirsîna çarenûsa Huseyîn Taşkaya li hev civiyane û got: "Huseyîn li Sêwregê muyeahîd bû. Di salên 1990'î de, Sêwreg di bin kontrola Eşîra Bucak de bû û raporên fermî ev avanî wekî 'dewletek di nav dewletê de' bi nav kirine. Huseyîn Taşkaya ku binpêkirinên cidî yên li Siwregê rexne kir, bû hedefa hem hêzên ewlehiyê û hem jî Eşîra Bucak. Ji ber zêdebûna gefan, malbata xwe şand Stenbolê û demekê li mala apê xwe ma da ku karûbarên xwe rêk bixe. Di 6'ê Kanûna 1993'yan de, leşker, polîs û cerdevanên ji Eşîra Bucak bi karwaneke ji 30 wesayîtan gihîştin mala apê wî ya li taxa Baglar a Sêwregê. Wan Huseyîn Taşkaya bi zorê girtin û bi wesayîteke leşkerî birin. Ev bûyer ji hêla xizm û niştecihên taxê ve hat dîtin. Malbat, cenderme, polîs, dozgerî û walîtî tu bersiv nedan malbatê."
Eren Keskînê ku ragihand ku rayedarên leşkerî îdia kirine ku Taşkaya piştî binçavkirinê teslîmî polîsan bûye û got ku lê polîs bi gotina "Ew li cem me nîne; ji Sedat Bucak bipirsin" meseleyê ji xwe dûr xistine. Eren Keskîn wiha domand: "Parlamanterê Partiya Dogrû Yolê (DYP) yê wê demê û sercerdevan Sedat Bucak wê demê got, 'Tîma me ew bir, lê wî ew radestî dewletê kir; yên mayî di çarçoveya agahdariya dewletê de ne.' Lêbelê, ji wê demê ve tiştek ji Huseyîn Taşkaya nehatiye bihîstin. Tevî hemû şahidiyan, Serdozgeriya Komarê Sêwregê bûyerê wekî 'îdiayek bêbingeh a malbatê' red kir û dozê bi biryara neşopandinê girt."
Eren Keskînê destnîşan kir ku ew ê dest ji têkoşîna xwe ya ji bo edaletê û cezakirina kiryaran bernedin.