ŞIRNEX - Li Roboskiyê, Zehîde Encu ya kurê xwe Aslan ê 17 salî di Komkujiya Roboskî de winda kir, mîna dayikên din di 7’emîn salvegera komkujiyê de gora kurê xwe hembêz kir û bi maçkirina kevirê gorê hewl da êş û xemên xwe derbas bike. Dayik Encu, got heya ew saxbin dê dest ji têkoşîna xwe ya edaletê bernedin.
Li gundê Roboskî yê navçeya Qilaban a Şirnexê, duh 19 jê zarok 34 welatiyên di Komkujiya Roboskî yên di bombebarana balafirên şer ên Hêzên Çekdarên Tirk (TSK) di 28’ê Kanûna 2011’an de jiyana xwe ji dest dan, di 7'emîn salvegera komkujiyê de li ser gorên xwe hatin bibîr anîn.
Bi bîranînê de êş û hêrs bi bandor bû. Malbatan kevirên gorên xizmên xwe hembêz kirin û hewl dan bi maçkirina kevirên goran êş û xemên xwe derbas bikin. Di daxuyaniya hat dayîn, edalet û eşkere kirina berpirsên komkujiyê hat xwestin û peyama berdewamkirina têkoşîna edaletê hat dayîn.
Yek ji dayikên ku di Komkujiya Roboskî de zarokên xwe winda kirin Zahîde Encu ye û ew jî mîna hemû malbatan dixwaze peyamên ku ew didin baş bên xwendin. Dayika Aslanê 17 salî yê di komkujiyê de jiyana xwe ji dest da Zahîde Encu jî mîna 7 salên derbas bûyî wênê kurê xwe kiribû hembêza xwe û beşdarî bîranînê bibû. Dayik Encu pir acize ku heya roja îro berpirsên komkujiyê nehatine diyar kirin.
'MIN PARÇEYÊN WÎ JÎ NEDÎTIN'
Dayik Encu, diyar kir ku wê parçeyên kurê xwe jî nedin û wiha axivî: “Ji bo kurê min û hemû mirovên din tu carî hiqûq nehat bi cih anîn. Zarokên bêguneh kuştin. Ji ber hin kurt û kêmasiyan pêvajoya darazê bi dawî bû. Bi awayekê têr û tije xwedî li dozan nehat derketin.”
'JI BER KU EM KURD BÛN KUŞTIN’
Encu ya derbarê bi awayekê tije xwedî nederketina dozê de gazincên xwe anî ziman, ev tişt gotin: “Li Sakarya, di demek pir nêz de Kadîr Sakçî yê 46 salî ji ber ku tenê Kurd bû hat kuştin û bû qûrbanê kuştina kîn û rikê. 34 kesên li Roboskî hatin kuştin, ji ber ku Kurt bûn hatin qetilkirin. Em Kurdin û ji ber ku em bi Kurdî diaxivin tên kuştin. Di heman demê de ev pirsgirêka mafê ye jî. Em mafê xwe dixwazin. Em jî dixwazin mîna hemû gelên din mafên xwe bi kar bînin.”
Encu, bal kişand ser zextên li wan tên kirin û wiha bilêv kir: “Bi tu awayî hesap ji berpirs û faîlan nehat xwestin. Ligel vê yekê jî piştî komkujiyê, em rastî gelek êrîş û zextan hatin. Parlementerê me Ferhat Encu îro girtiye. Me neheqî li dewletê nekiriye. Berevajî dewletê neheqî li me kir. Gelo ev qet destên xwe na danîn ser wijdanên xwe? Ma tu caran nabêjin mafê Kurdan jî hene? Gelo çima tim zarokên me tên kuştin?”
‘HEYA EM SAXBIN…’
Zahîd Encu, dest nîşan kir ku heya edalet neyê cih, ewê tu caran dest ji têkoşîna xwe bernedin û wiha bi dawî kir: “Heya ku em saxbin, emê ji bo şehîdên Roboskî têbikoşin.”