MÊRDÎN – Li gundê Girherîn ya bi ser navçeya Artûklûyê ve trafoyên ceryanê rê li ber mirinê vedikin. Şalterên trafo li ser hev diavêjin û ji ber rayedar naçin trafo çênakin gundî neçar dimînin bi daran şalteran radikin û ev yek jî jiyana wan dixe nava talûkeyê.
Li gundê Giherîn a bi ser navçeya Artûklû ya Mêrdînê ve ku xwedî 12 hezar nifûs e, ji ber trafoyên ceryanê yên DEDAŞ’ê xerabe ne rê li ber mirinê vedike. Ji ber ku trafo biçûk in û nikare qewetê rake şalterên wan diavêjin. Rayedar naçin mudaxeleyî trafoyan nakin û serê her kêliyê kar dikeve ser milê gundiyan ku biçin bi daran şalterên trafoyan rakin. Şalter serê her kêliyê diavêjin û welatiyan şerpeze dikin. Welatî nikarin pêdiviyên xwe rojane pêk bînin. Her wiha têlên ceryanê diçin malan jî rê li ber talûkeyek mezin vedikin. Dema ba tê, têl li hev dikevin û çirûskên ji wan dirijin rê li ber talûkeya şewitandina malan jî vedike. Bênavber trafoyên li gund jî diteqin.
KESEK JÎ JIYANA XWE JI DEST DA LÊ TIŞTEK NEGUHERÎ
DEDAŞ’a ku divê trafoyên diteqin biqewet û mezin bike, tenê kabloyan û şalteran nû dike. Di mehên derbasbûyî de welatiyê bi navê Azîz Akbalik xwet biçe şanterê rake û bi ceryanê ve zeliqî û jiyana xwe ji dest da. Tevî vê yekê jî trafo nayên tedbîrkirin. Şêniyên gund dixwazin ku rayedar biçin karê xwe bikin.
Ji şêniyên gund Îsa Atilmiş diyar kir ku ji ber trafoyên wan xerabe ne bû sedema mirina cîranê wî Azîz Akbalik û ew naxwazin kesek din ji ber trafoyan jiyana xwe ji dest bide. Atilmiş got serê her kêliyê trafo talûkeyê didin gund û xwest DEDAŞ demildest çareseriyê ji trafoyan re bibîne.
ŞALTERAN BI DARAN RADIKIN
Ji şêniyan Eyup Atilmiş jî destnîşan kir ku tevî ew hemû derdên xwe ji DEDAŞ’ê re jî dibêjin pirsgirêkên wan bê çareserî dimînin û li şûna talûkeyê ew xizmetek bi ewle dixwazin. Atilmiş da zanîn ku her kêlî trafo bi rîska teqîndinê re rû bi rû ye û şalterên wan li ser hev diavêjin û ew neçarin şalteran bi daran rakin.
6 ROJ E CERYANA WAN TUNE YE
Esnaf Şukru Akbalik yê ku pismamê wî bi ceryanê ve zeliqî û jiyana xwe ji dest da jî got ji ber ceryan diçe ew nikarin karê xwe bikin.
Ji welatiyan Mehmet Carti jî anî ziman ku ji ber trafo û xetên ceryanê dişewitin ev 6 roj in ceryana wan nîne û got: “Ligel em li DEDAŞ’ê digerin jî nayên trafoyên me çênakin. 6 roj in rayedarek DEDAŞ’ê nehatiye gund. Niha ez mala xwe bi fenera destan ronî dikim. Em dixwazin demildest werin ceryana me çareser bikin.”
MA / Ahmet Kanbal