RIHA - Mehmet Ocalan, bal kişand ser çalakiyên greva birçîbûnê yên der barê tecrîdkirina Rêberê PKK'ê Abdullah Ocalan de û got: "Divê tenê ne bi gotinê, em bi pratîkê jî nîşan bidin ku em tecrîdê qebûl nakin. Divê ji bo vê hîn bêtir nîqaş bên çêkirin û di çarçoveya van nîqaşan de demildest biryar bên girtin û pêk bên."
Ji bo dawî li tecrîdkirina Rêberê PKK'ê Abdullah Ocalan bê, Hevseroka Kongreya CIvak demokratîk (KCD) û Parlementera HDP'ê ya Colemêrgê Leyla Guven ji 8'ê Mijdara 2018'an ve li Girtîgeha Tîpa E ya Amedê di greva birçîbûnê ya bêdem û bêdorveger de ye. Her wiha li girtîgehan jî 156 girtiyên PKK'yî bi heman daxwazê di greva birçîbûnê ya bêdem û bêdorveger de ne. Malbata Ocalan, got divê herkes bibe dengê girtyiyan.
Li gundê Amarê yê Xelfetiya Rihayê biraziyê Ocalan Alî Ocalan, girtiyên li hemberî tecrîdê bedena xwe dane be rbirçîbûnê silav kirin. Ocalan, diyar kir ku divê li hemberî tecrîdê gotina herkesî hebe. Ocalan, destnîşan kir ku tenê ne li girtîgehan divê li her çar perçeyên Kurdistanê kurd li hemberî tecrîdê bi awayekî topyekûn bitêkoşin. Ocalan, diyar kir ku 20 sal in Rêberê PKK'ê Abdullah Ocalan tê tecrîdkirin, lê berê salê carekê bûna jî malbatê hevdîtin pêk dianî. Ocalan, destnîşan kir ku rewşa heyî welat ber bi aloziyê ve biriye û ji roja ku hevdîtina bi Ocalan re hatiye astegkirin şerê li welat kûrtir bûye.
‘DIVÊ HEVDÎTIN ÇÊBIBE'
Alî Ocalan, diyar kir ku li girtîgehan bi sedan girtî li hemberî tecrîdê dest bi greva birçîbûnê kirine û ew piştgiriyê didin çalakiya Hevseroka KCD'ê Leyla Guvenê û ya hemû girtiyan. Ocalan, bilêv kir ku divê dewlet guh bide van çalakiyan û berî kur grevên birçîbûnê têkevina stên dijwar û neveger divê dawî li tecrîdê bê û daxwaza girtiyan bê qebûlkirin. Alî Ocalan, anî ziman ku 3 sal in wan tu agahî ji Ocalan negirtiye û ji ber vê der barê tenduristî û jiyana Ocalan de şik û guman li gelên Rojhilata Navîn peyda bûye û ji bo ev şik û guman ji holê bên rakirin divê hevdîrin bi Ocalan re çêbibe.
Mehmet Ocalan, birayê Rêberê PKK'ê Abdullah Ocalan, jî destnîşan kir ku polîtîkaya tecrîdê bi tu awayî nayê qebûlkirin lê belê divê ev tenê ne bi gotinê be. Ocalan, diyar kir ku divê ji bo vê demildest liv û tevger çêbibin û got: "Divê tenê ne bi gotinê, em bi pratîkê jî nîşan bidin ku em tecrîdê qebûl nakin. Divê ji bo vê hîn bêtir nîqaş bên çêkirin û di çarçoveya van nîqaşan de demildest biryar bên girtin û pêk bên." Ocalan, anî ziman ku di têkoşîna li hemberî tecrîdê de bar dikeve ser milê herkesî û divê herkes hay ji vê berpirsiyariya xwe hebe û li gor wê tev bigere.
'LI HEMÛ QADAN'
Mehmet Ocalan, diyar kir ku divê kesên li derve berpirsiyariya xwe li girtiyan bar nekin û got: "Girtî her roj têdikoşin. Ew bi zext û zoriyan re rû bi rû dimînin. Belê li derve jî zext û zorî hene, lê belê derve bêtir afirîner e û ji bo berxwedanên mezin rê hene. Loma divê herkes bi vê berpirsiyariyê tev bigere û li gor vê bitêkoşe." Ocalan, destnîşan kir ku têkoşîna li hemberî tecrîdê divê tenê ji girtîgehan re neyê hiştin û ev ne tiştekî ehlaqî ye jî, divê li hemû qadên jiyanê herkes bi awayekî demokratîk berteka xwe nîşan bide. Mehmet Ocalan, bilêv kir ku ji bilî têkoşînê tu rê tune ne û ji bo vê bang li raya giştî ya demokratîk û ya cîhanê kir: "Bang li hemû rêxistinên civaka sivîl û hemû derdorên civakê dikim ku li hemberî tecrîdê bertek nîşan bidin. Di serî de CPT divê hemû saziyên mafên mirovan li hemberî tecrîdê demildest tev bigerin."
MA / Erdogan Alayumat