SÊRT - Li Sêrtê, derket holê ku li 39 daîreyên înşaateke ku nayê bikaranîn 441 hilbijêr hatine qeydkirin. Hevserokê HDP'a Sêrtê bang li 3 hezar hilbijêrên ku qeyda wan hatiye jêbirin kir û xwest heta sibê qeyda xwe çêbikin. 

 

Li Sêrtê, ji bo hilbijartina herêmî ya 31'ê Adarê derketibû holê ku qeyda 6 hezar û 488 hilbijêrî hatine jêbirin. Di 31'ê Kanûna 2018'an de wexta welatiyan xwest li Midûriyeta Nifûsê ya Bajêr qeyda xwe çêbikin, bi bersiva "ferman e, em nikarin çêbikin" û ji ber vê bi hezaran welatî nikaribû qeyda çêbikin. Piştî HDP'ê der barê vê yekê de daxuyanî da nêzî 3 hezar hilbijêr çûn Midûriyeta Nifûsê ya Bajêr û qeyda xwe nû kirin. Lê belê li bajêr qeyda bi hezaran welatiyî nehat çêkirin. Ji bo dîroka dawî ya qeydkirinê bê dirêjkirin HDP'ê serî li YSK'ê da. Lê belê berê ÎYÎ Partiya Sêrtê jî ji bo dirêjkirina dema qeydan serî li YSK'ê dabû, lê belê YSK'ê serlêdan red kiribû. 

 

LI WARGEHA XWENDEKARAN HILBIJÊRÊN TEMENÊ WAN DI NAVBERA 30-40 SALÎ DE 

 

Piştî qeydên hilbijêran hatin jêbirin, derket holê ku di daneyên YSK'ê de hilbijêrên xeyalî hene. Li Mêvanxaneya Keçan a Fatma Zehra ya Sêrtê ku kapasîteya wê 50 kes e, niha 110 hilbijêr li ser qeyd kirîne. Li wargeha xwendekaran ji xeynî kesên temenê wan 20 salî hilbjêrên temenê wan di navbera 30-40 salî de jî dixuyên. Her wiha li Wargeha Lîseya Pîşeyî û Teknîkî ya Anatolyayê ya Zubeyde Hanimê jî derket holê ku hilbijêrên temenê wan di ser 30'yî re hene. Li avahiya Navenda Civaka Pirmebestî ya Sêrtê jî 11 hilbijêr hatine qeydkirin. 

 

LI ÎNŞEATAN JÎ HILBIJÊR QEYD KIRIN 

 

Li avahiya jimare 21 a kuçeya 318'an a Taxa DÎH'ê 765 hilbijêr, li avahiya jimare 58 a Kolana Hayrî Ozlu ya Taxa DÎH'ê 528 hilbijêr, li avahiya jimare 21 a Kolana Şehît Onbaşi Suleyman Aydin a Taxa Fatîhê 102 hilbijêr derketin holê. Her wiha tişta ecêb jî ew e ku li ser avahiyên hîn înşeat in gelek hilbijêrên xeyalî hatine qeydkirin. Yek ji van navnîşanan jî li apartmana C2 a Kuçeya 1570'yan a Taxa Yeniyê ye. Li 39 daîreyên cuda yên vê avahiya hîn înşeat e û kes lê najî 441 hilbijêr hatine qeydkirin. 

 

QEYDA 3 HEZAR HILBIJÊRÎ NEHAT ÇÊKIRIN 

 

Parlementerê HDP'ê yê Sêrtê Serdar Batûr, destnîşan kir ku ji kesên qeyda wan hatine jêbirin 3 hezar jê qeydên xwe nû kirine, lê belê qeyda 3 hezar hilbijêrî jî nehatiye çêkirin. 

 

Batûr, bilêv kir ku wan ji bo qeyda hilbijêran Komîsyona Hiqûqê ava kiriye û ji bo dema qeydê bê dirêjkirin wan serî li YSK'ê daye. Batûr got: "Eger ji ber qelebalixiyê û ji ber hinceteke din hilbijêr nikaribin qeyda xwe çêbikin, em dixwazin serî ki me bidin. Me li Sêrtê seferberî îlan kiriye û em bi şev û biroj ji bo qeydên hilbijêran dixebitin. Lê belê tê gotin tenê rojê qeyda 70 hilbijêrî tê çêkirin." 

 

Batûr, diyar kir ku ji bo qeyda hilbijêrên xeyalî jî xebatên wan didomin. Batûr got, ji bo qeydên hilbijêrên xeyalî bên jêbirin wan serî li YSK'ê daye û ew ê gilî bikin. 

 

BANGAWAZÎ: SIBÊ ROJA DAWÎ YE 

 

Batûr, destnîşan kir ku ji bo qeyda hilbijêran sibê roja dawî ye û ji bo qeydan bang li hilbijêran kir: "AKP wekî li kuçeyan dixebite xwe dide nîşandan. Em derî bi derî digerin û ji hilbijêran re dibêjin ku xwedî li dengên xwe derkevin. Gel jî bi awayekî zêde xwedî li vê yekê derdikeve. Em careke din bang li hemû hilbijêran dikin; sibê roja dawî ye û divê herkes qeyda xwe çêbike." 

 

MA / Metin Yoksu