MÊRDÎN – Rêveberê Komeleya 78’an Arîf Turgay têkildarî çalakiya grevên birçîbûnê de got: “Berxwedana Leyla wek çirûska Mazlum e. Dewlet bi xwe jî dizane dê girtî çibikin.”
Çalakiya greva birçîbûnê ya Hevseroka KCD’ê û Parlamentera HDP’ê Leyla Guven û girtiyên din a bêdawî û bêdorveger a ji bo rakirina tecrîdkirina Rêberê PKK’ê Abdullah Ocalan didome. Çalakiya Guven di roja 80’emîn de û çalakiya 234 girtiyan di roja 42’yemîn de didome. Yek ji şahidên rojiya mirinê ya salên 1980’î ya li Zîndana Amedê Endamê Desteya Rêveberiya Giştî ya Komeleya Lêkolîn û Piştevaniyê ya 78’an Arîf Turgay ê berdevkê Mêrdînê der barê grevên birçîbûnê de axivî.
'ZÎNDANA AMEDÊ CIHÊ TECRÛBEYÊ YE’
Turgay da zanîn ku ew di navbera salên 1982 û 1988’an de li Zîndana Amedê girtî bûye û dema rojiya mirinê dest pê kir ew di greva birçîbûnê de bûne. Turgay anî ziman ku Zîndana Amedê cihê tecrûbeya grevên birçîbûnê û rojiya mirinê ye û got: “Di sala 1982’an de bi derketina Mazlum Dogan re wê serdemê çirûska berxwedanek nû dest pê kir. Piştî şehadeta Mazlum, Çaran yanî Eşref Anyik, Mahmut Zengîn, Necmî Oner û Ferhat Kurtay bedena xwe dan ber agir. Bi şehadeta rojiya mirinê ya mezin Kemal Pîr, Mehmet Hayrî Durmuş, Akîf Yilmaz û Alî Çîçek pêvajoyek nû da destpêkirin.”
‘DEWLAT JÎ ARMANCA GIRTIYAN DIZANE’
Turgay diyar kir ku gelê kurd gelek êşên mezin kişandin û wiha got: “Bi qasî êşan berxwedanê jî xwe da nîşandan. Me destkeftiyên mezin bi dest xist. Gelek ji nû ve hat afirandin. Kevneşopiyek berxwedanê hat afirandin. Em berxwedana xwe jî û destkeftiyên xwe jî didomînin. Tevî hemû qewimandinan jî yên welat birêve dibin ders ji vê yekê dernexistin. Rêbazên xwe yên kevn didomînin. Di esasê xwe de dewlet bi xwe jî dizane û şahid e ku wê girtî çibikin.”
‘DIŞIBE ÇIRÛSKA MAZLUM’
Turgay bi bîr xist ku grevên di pêşengiya Guven de hat destpêkirin berxwedana ji salên 80’î ve ya li zîndanan dide nîşandan û got: “Derketin û pêşengiya Leyla dişibe çirûska Mazlum. Wê demê îşkence di asta herî jor de bûn. Mazlum rabû û li dijî zilmê rabû û bi çalakiya xwe ji tariyê re bû ronî. Çalakiya Leyla jî di vî warî de gelek dişibe çalakiya Mazlum Dogan.”
MA / Ahmet Kanbal