WAN - HDP’ê li Wanê mîtîngek dawî ya bi heybet li dar xist. Ji serê sibehê ve gel berê xwe da qada mîtîngê û mirov dikare bêje Waniyan li qada mitîngê provaya serkeftina xwe ya 31’ê Adarê kir.
Rêxistina HDP’ê ya Wanê mitînga xwe ya dawî ango fînalê li navenda Wanê li Qada Bêşyolê li dar xist. Gelê Wanê ji serê sibehê ve herikî qada ku bi rengên HDP’ê hatibû xemilandin. Bi deh hezaran kes beşdarî mitîngê bû û mirov dikare bêje ku Waniyan bi mitînga heybet provaya serkeftina xwe ya roja hilbijartinê ya 31’ê Adarê nîşan da. Hevserokên HDP’ê yên Wanê Yadîşen Karabûlak û Umît Dede, Hevserokên DBP’ê yên Wanê Ayla Tarhan û Okkeş Kawa, parlementera HDP’ê ya Wanê Mûazzez Orhan, Parlamentera HDP’ê ya Êlihê Feleknas Uca, Namzetên Hevşaredariya HDP’ê yên Bajarê Mezin a Wanê Bedîa Ozgokçe Ertan û Mûstafa Avci, namzetên hevşaredariyê yên navçeyan, nûnerên KCD’ê û aktîvîstên TJA’yê beşdarî mîtîngê bûn. Di mitîngê de gel da xuyakirin ku ew ê 14 şaredariyên Wanê jî bi dest bixin.
DEDE: ME DAYÎKA TAYBET JI BÎR NEKIRIYE
Hevserokê HDP’ê yê Wanê Umît Dede di destpêkirina mîtîngê de axivî û got: “Me Dayîka Taybet û Roboskî ji bîr nekiriye. Divê tecrîda li ser Ocalan were rakirin, heke tecrîd were rakirin wê aramî were Tirkiyeyê.”
OZGOKÇE: 31’Ê ADARÊ ROJA ÊDÎ BES BÛNÊ YE
Namzeta Hevşaredariya Wanê Bedîa Ozgokçe jî bi silavkirina siyasetmedarên girtî dest bi axaftina xwe kir û got: “Di 31’ê Adarê de em ê ji xespa qeyûm re bibêjin êdî bes e. Di 31’ê Adarê de em ê bersivê bidin Erdogan.”
Namzetê Hevşaredariya Wanê Mûstafa Avci jî diyar kir ku di 31’ê Adarê de wê gelê Wanê hemû qirêjiyên desthilatdariyê paqij bike.
Peyama Hevşaredarê Bajarê Mezin a Wanê Bekîr Kaya yê girtî jî di mîtîngê de hat xwendin.
UCA: GELÊ WANÊ SERKEFTINA 31’Ê ADARÊ DA
Parlementera HDP’ê ya Êlihê Feleknas Uca di mitîngê de axivî û diyar kir ku gelê Wanê ji niha ve serkeftina 31’ê Adarê daye û got: “Gelê me li hemberî zext, girtin û kuştin û qetlîaman stûyê xwe xwar nekir. Parlementerên me Leyla Guven, Tayyip Temel, Mûrat Sarisaç û Dêrsim Dag îro li Amedê di greva birçîbûnê de ne. Daxwazên wan, daxwazên me ne. 8 sal in rêzdar Ocalan nikare bi parêzerên xwe re bicive. Ocalan di bin tecrîdeke giran de ye. Di nava hefteyekê de 5 şehadet pêk hatin. Berpirsê van şehadetan dewlet e. Em ê tecrîdê bişkînin û faşîzmê hilweşînin.”
Piştî axaftina Uca gel ji bo destekdayîna çalakiyên greva birçîbûnê 2 deqîqe çalakiya bêdengiyê li dar xist.
Mîtîng bi konsera Koma Pel bi dawî bû.