STENBOL – Serokê Desteya Rêvebir ê TMMOB'ê Emîn Koramaz, diyar kir ku li herêmê di şexsê HDP'ê de gel xwedî li bajarên xwe derketiye û Serokê Giştî yê ÎMO'yê Cemal Gokçe jî bilêv kir ku HDP'ê bi stratejiya xwe pesend kiriye ku "em dikarin bi hev re bijîn."
Serokê Giştî yç Odeya Endezyarên Înşeatê (ÎMO) Cemal Gokçe û Serokê Desteya Rêvebir ê Yekîtiya Odeyên Endezyar û Mîmarên Tirk (TMMOB) Emîn Koramaz, encamên hilbijartina 31'ê Adarê nirxandin
'EM DIKARIN BI HEV RE BIJÎN'
Gokçe, diyar kir ku stenboliyan di vê hilbijartinê de bersiveke baş daye kesên gotin "me îxanet li Stenbolê kir" û got: "Pirsgirêkên sereke yên mirovan hene. Divê mirov li gor wan pirsgirêkan tev bigere. Divê rêya jina bi hev re bê vekirin. Em bixwazin û nexwezin jî wê li vî welatî mirovên ji nasname û baweriyên cuda bi hev re bijîn û dijîn jî. Astengkirina vê ne pêkan e."
Gokçe, destnîşan kir ku HDP di vê hilbijartinê de li gor jiyana bi hev re tev geriyaye û got: "HDP, pesend kir ku em dikarin bi hev re bijîn."
'GEL XWEDÎ LI BAJARÊN XWE DERKETIN'
Koramaz jî destnîşan kir ku tevî hemû zext û zoriyên di pêvajoya hilbijartinê de rû dan jî gel dev ji baweriya xwe ya ji bo demokrasiyê bernedaye û gotinên Erdogan ku berê gotibû "me îxanet li Stenbolê kir" bi bîr xist û got: "Gel bersivaa herî baş da feraseta AKP'ê."
Koramaz, bal kişand ser stratejiya HDP'ê jî û got: "Stratejiya HDP'ê di cî de bû. Kurdan, ji feraseta AKP'ê, ji nîjadperestî û netewperestiyê re got na û dengên xwe dan partiyên li hemberî AKP-MHP'ê. Li herêmê jî pêvajoyeke pir antîdemokratîk hebû. Propaganda di şert û mercên newekehve de hat kirin. Tevî hemû girtinan û derfetên ne wekhev jî encamên herêmê baş in. Şaredarî i dest qeyûman de bûn. Vîna gel hatibû binpêkirin. Kesên gel ew hilbijartibûn hin jê hatibûn girtin û qeyûm hatibûn tayînkirin. Ji bo qeyûm bi ser biekvin budçeya navendî heta dawiyê xebitî, lê tevî hemû bêperwatiya wan jî gel xwedî li bajarên xwe derketin."
MA / Sadiye Eser