RIHA – Birayê Rêberê PKK’ê Abdullah Ocalan, Mehmet Ocalan bal kişand ser dorpêça gundê Amara ku Ocalan lê hatiye dinê û got: “Rêberê gelê kurd tenê ne li vî gundî hatiye dinê. Li her deverê hatiye dinê. Her bihosta ku çûyê bû warê wî. Ji ber vê yekê divê kurd li her cihê lê ne vê rojê pîroz bikin.”
Rêberê PKK’ê Abdullah Ocalan di 4’ê Nîsana 1949’an li Gundê Amara ya girêdayî Navçeya Xelfetiya Rihayê hat dinê. Birayê Ocalan, Mehmet Ocalan bal kişand ser girîngî û wateya 4’ê Nîsanê û greva birçîbûnê ya li dijî tecrîdkirina Ocalan didome.
‘TENÊ EM WEK ROJA ROJBÛNÊ NIKARIN BIGIRIN DEST’
Mehmet Ocalan diyar kir ku 20 sal in tecrîd li ser Ocalan didome û di 3 salên dawî de ev tecrîd li her devera welat belav bûye û divê ewilî gelên Tirkiyeyê tecrîda li ser xwe bişkînin. Ocalan da zanîn ku 4’ê Nîsanê tenê ne wek rojbûna Ocalan divê bigirin dest û got: “Em nikarin wek şexsekî li Birêz Ocalan binêhirin. Ji ber vê yekê ev ne wek rojbûna kesekî divê em wek gelek ji nû ve zindî bû binêhirin. Ocalan bi tunebûnê re rû bi rû maye. Ocalan adeta gelekî ji nû ve wan ji xweliya wan afirand. Ji bo vê yekê divê tu kes wek şexsekî li Ocalan nenihêre. Divê bi çavê nûner û rêberekî li bê nihêrîn û vê rojê wisa pîroz bike.”
‘TEKANE RÊ MEZINKIRINA BERXWEDANÊ YE’
Mehmet Ocalan bal kişand ser greva birçîbûnê ya li dijî tecrîdkirina Ocalan û ji bo tecrîd bê rakirin li girtîgehan 6 kes û li Ewrûpa jî kesek dawî li jiyana xwe anîn. Ocalan da zanîn ku çalakiyên li dijî tecrîdê hatin destpêkirin pirr mezin e û got: “Lê xwedî derketina li çalakiyê gellek qels e. Pergal tenê ne civakê hemû zîhnan jî kiriye bin tecrîdê. Şikandina vê tecrîdê bi mezinkirina berxwedanê pêkan e.”
‘BILA KES BERPIRSIYARIYA XWE NEDE SER MILÊ GIRTIYAN’
Ocalan çalakiyên greva birçîbûnê ya sala 2012’an pêk hat bi bîr xist û wiha got: “Birêz Ocalan wê demê jî greva birçîbûnê rexne dikir û digot ‘bila yên derve berpirsyariya xwe nedin ser milê girtiyan.’ Rexne wê demê Serok dikir îro jî derbasdar e. Yên li derve hemû berpirsiyariya xwe dane ser milên girtiyan. Ev terz talûke ye. Divê her kes demildest ji vê xewê şiyar bibe û tişta dikeve ser milê wan pêk bîne. Heke li dijî tecrîdê têkoşîn neyê mezinkirin wê li girtîgehan pêşiya agahiya mirinan neyê girtin.”
‘TIRKIYE HEMÛ DINYAYÊ KIRIYE ŞIRÎKÊ VÎ SÛCÎ’
Ocalan bêdengiya raya giştî û saziyên navnetewî jî rexne kir û got: “Tirkiye û Ewrûpa li gorî rêzik û yasayên xwe tevnagerin. Divê welatên Ewrûpa ji bo Tirkiye li gorî qanûnên xwe tevger bike hişyar bike. Ancak li holê sûcek tê kirin. Tirkiyeyê hemû dinya kiriye şirîkê vî sûcî.”
‘EM DERSEKÊ BIDIN VÊ ZÎHNIYETÊ’
Ocalan destnîşan kir ku divê kurd rojbûna Ocalan li Tirkiyeyê û her devera cîhanê veguherîne roja berxwedanê û got: “Îro dewlet nahêle ku gelê kurd bê gundê Serokatiya xwe. Rêberê gelê kurd tenê ne li vî gundî hatiye dinê. Li her deverê hatiye dinê. Her bihosta ku çûyê bû warê wî. Ji ber vê yekê divê kurd li her cihê lê ne vê rojê pîroz bikin. Divê îro dersek mezin li dijî vê zîhniyeta qedexeker û qirker bê dayîn. Bi vê wesîleyê ez 4’ê Nîsanê li hemû gelê kurd pîroz dikim.”
MA / Erdogan Alayumat