COLEMÊRG - HDP’iyan diyar kir ku li Çelê gel dengê xwe da HDP’ê û gotin: “Li Çelê HDP, li hemberî dewletê ket hilbijartinê. AKP li Çelê bi dengê eskerên qezenc kir.”
Li navçeya Çelê ya Colemêrgê, ji ber bi hezaran esker wekî hilbijêr qeyd kirin, namzetê tifaqa AKP/MHP’ê di hilbijartina herêmî ya 31’ê Adarê de bi rêjeya ji sedî 55.75 dengan bû yekemîn. Partiya Demokratîk a Gelan (HDP) li ser vê yekê got ku li Çelê hilbijartinek demokratîk pêk nehatiye. HDP’iyan, destnîşan kir ku ger dengên gel esas bê girtin, ew bi ser ketine. Hevseroka HDP’ê ya Navçeya Çelê Halîme Şikşek, anî ziman ku li Çelê hilbijartin dibin zextek pir mezin de pêk hat û wiha axivî: “Dewletê di roja hilbijartinê de zext zêde kir. Bi zextên derûnî bi ser ket. Hîle, lîstik û zextên tifaqa AKP û MHP’ê di vê hilbijatinê de zêde bûn. Bi taybetî li Çelê pir hîle hatin kirin. Dema Wezîrê Karê Hûndir Suleyman Soylû navçe ziyaret kir, soz da ku 150 kesan bike kadro. Esker û polîs li ser gund û navçeyê qeyd kirin. Esker û polîs ji derve anîn û wekî hilbijêr qeyd kirin û bi vê yekê hîle kirin." Şîmşek, da zanîn ku dengên gel ên li navçeyê îkamet dikin 2 hezar û 200 kes in û wiha berdewam kir: "Li aliyê din hêjmara ezker û polîsan ên hatin qeydkirin 4 hezar û 690 kes in. Zext û lîstik pir zêde bûn."
'HEMÛ ESKER LI QEREQOLÊN SÎNOR WEKÎ HILBIJÊR QEYD KIRIN'
Endamê Meclîsa Giştî ya Bajêr a HDP’ê Fariz Çetînkaya jî, da zanîn ku ger dengên gel esas bê girtin, HDP’ê qezenc kiriye û wiha axivî: “Hikumet ji bo ku li navçeyê qezenc bike, berê amadekarî kiribûn. Raya giştî jî ev zanîbû. Navçeya Çelê li ser sînor e û cihekî stratejîk e. Li ser her girekî Çelê qereqolek heye. Hemû eskerên di van qereqolan wekî hilbijêr li ser Çelê qeyd kirin. Tu mafê eskeran ên li gundên derdorê dimînin bên navçeyê dengan bidin tuneye. Ger mafên van eskeran hebe, wê demê mafê sivîlên li van gund dijîn jî heye ku bên navçeyê dengê xwe bidin. Lê ligel hemû dek û dolaban jî me li Çelê bi dengê sivîlan şaredarî qezenc kir. Gelê Çelê dengê xwe da me. Ji xwe hilbijartina li vê derê di navbera HDP û AKP’ê de derbas nebû, di navbera HDP û dewletê de derbas bû. Di hilbijarina 2014’an de me li vê derê hezar û 650 deng girtin û AKP'ê jî 850 deng girtibûn. Di vê hilbijartinê de jî me hezar û 663 deng girtin û wan jî 2 hezar û 550 deng girtin. Ji ber esker û polîs qeyd kirin rêjeya dengê wan zêde bû. Bi giştî li herêmên ser sînor ev polîtîka bi rêve birin. Tişta me xemgin dike, vîna gelê me xesp kirin. Lê dîsa jî ev kar bi dawî nebûye. Çi dibe bila bibe emê şaredariya xwe qezenc bikin. Em spasiya gelê xwe dikin. Dîsa em bi tenê nehiştin."
‘LÎSTIKEK MEZIN KIRIN’
Namzetê Hevşaredariya HDP’ê yê Çelê Ebûbekîr Kanar jî, anî ziman ku hikumetê lîstikên mezin kirin û wiha got: “Çelê hem ji bo gelê Kurd û hem jî ji bo hikumetê navçeyek stratejîke. Dewlet girîngiyek mezin dide Çelê û Şirnexê. Ji ber ku dewletê fêm kir ku dê nekare bi hêza gel şaredariyên herêmê qezenc bike. Ji bo wê esker li vir qeyd kirin. Ji nifûsa navçeyê zêdetir esker qeyd kirin. Li gel ku li gundê Aşûtê muxtarî heye jî esker hatin li navçeye dengê xwe dan. Eskerên li hemû gundan hatin li Çelê dengê xwe dan û vegeriyan. Ji bo şaredariyê bi dest bixin her tişt kirin."
‘EM MINETDARÊ GELÊ ÇELÊ NE’
Kanar, destnîşan kir ku dema pêvajoya hilbijartinê hemû burokratên dewletê hatin vê derê û weke xebatkarên partiyê xebitin û wiha bi dawî kir: “Hin caran walî di hefteyekê de 4 caran dihat vir û ferman dida. Li Çelê li 11 navnîşanan 2-3 hezar kes qeyd kirin. Tenê li navnîşanekê 627 kes qeyd kirin. Lê ligel van hemûyan jî gel qezenc kir. Em spasiya gelê xwe dikin. Em her tim mînetdarê gelê xwe yê Çelê ne. Gelê me peywira xwe bi cih anî û li pişt partiya xwe sekinin. Wan ne bi vîna gel, bi dengên eskeran qezenc kirin.”
MA / Hamza Gunduz