COLEMÊRG - Şaredariya Geverê ku qeyûm 680 milyon TL deyn xistiye stuyê wê, 3 meh in nikare meaşê karkerên xwe bide. Hevşaredar Îrfan Sari, bang li her kesî kir ku bi dildariyî tev li nav xebatên şaredariyê bibin û got, ew guh didin gel û hewl didin pêkve texrîbata hatiye çêkirin ji holê rabikin.
Şaredariya Geverê ya HDP'î ku bi 680 milyon TL deyn şaredarî ji qeyûm dewr girt, ji ber deynan hema bêje nikare bixebite. Hevşaredar Îrfan Sari, bal kişand ser rewşa şaredariyê.
'EM BI HÊZA XWE YA XWESER PIRSGIRÊKAN ÇARESER DIKIN'
Sari, bilêv kir ku piştî hilbijartina 31'ê Adarê wan şantiyeyeke mezin a 680 milyon TL deynê wê heye dewr girtiye, lê belê dîsa jî ew dadikevin kuçeyê û bi derfetên heyî rêyan çêdikin, taxan derman dikirin, peyarêyan çêdikin û park û baxçeyan diselihînin. Sari, got: "Em wekî meclîsa şaredariyê pirsgirêkan li cihê cih tespît dikin, bi gel re parve dikin û hewl didin çareser bikin. Heta niha me ev yek hinekî pêk aniye. Lê moarşî, despotî û kesayetiyên bêkesayetî yên dewletê jî derketin pêşberî me. Astengiyên wekî 'milk ê min e, hûn nikarin peyarêyan çêbikin, hûn nikarin avê bînin, hûn nikarin di nav erdê min re derbas bibin' jî derketin pêşberî me. Lê belê me ev astengî bi rêya diyalog û şaredarîvaniyeke gelparêz û demokratîk hel kirin. Helbet di hin xalan de me nikaribû hin tiştan hel bike, lê belê ji bo van jî em dixebitin. Lê dîsa jî me hêza xwe ya xwezar, jêderên xwe yê xweser esas girt. Hema bêje niha jêderên me yên xweser derameta ji avêt tê bixwe ye. Û em bi vî pereyî tenê dikarin sotemeniyê bikirin. Em vê jî ji bo wesayîtên xwe xerc dikin da karibin paqijiyê bikin, çopan hilgirin û veguhêzînin."
‘JI BO ÇARESERKIRINA PIRSGIRÊKAN GEL LI CEM ME YE'
Sari, destnîşan kir ku ji ber deynên şaredariyê dewrî Bankeya Îllerê hatine kirin 3 meh in nikarin meaşê xebatkaran jî bidin û ew jî bi karkeran re dixebitin. Sari, diyar kir ku ji ber budçeya şaredariyê tune ye xwe bi xwe jêderan diafirînin û pê xizmeta gel dikin. Sari, got: "Wexta pêdiviya me bi makîneyeke karî hebe, em li ser medyaya civakî parve dikin. Pêdiviya me bi tanqêreke avê û arazozê hebû. Me makîneyeke xwe ya xirabe ku di xeracê de bû selihand û tankêrek li ser bi cih kir. Her wiha bi saya heval û kedkarên me yên li pîşesaziyê me tankeke avê çêkir. Ji xeynî vê diviya me park, baxçe û refuj sererast bikirana û li dijî kelmêşan tev bigeriyana. Ji bo vê jî me hin kampanya dan destpêkirin û me derman bi dest xist. Heta ji Stenbolê jî alîkarî hat. Me bi dermankirinê pirsgirêkên bi vî rengî çareser kir. Di warê çareserkirina pirsgirêkan de gel li cem me bû."
TEXRÎBATA ÇANDÎ Û CIVAKIYÎ
Sari, destnîşan kir ku li Geverê ligel pirsgirêkên aborî di warê çandî û civakiyî de jî texrîbateke mezin heye û got: "Tenê em behsa kêşeyeke aborî nakin. Li vira saziyên jinan hemû hatin deformekirin, qedexekirin û tunekirin. Pergalê hin mekanîkên dejenerebûyînê xistine dewrê. Em bi rewşeke ku li ber qeymeqam quncik tên girtin, bi rewşeke ku tu hêleke wê ya çandeyî tune ye re rû bi rû man. Zarok û ciwan jî di heman rewşê de ne. Ji bo evana tu xebat nehatine kirin. Tenê di ser Yuksekova Belediyesporê re hin musabeqeyên futbolê hatine kirin. Yanî tu çalakiyên çandî, civakiyî nemane, di ser kafe û înternet kafeyan çandeke nû hatiye afirandin. Ji dêvla çandeke li ser kokaka xwe bilind dibe çandeke deformeyî heye. Niha em ji bo vê tev digerin. Ji bo vê em dibin mêvanên gel, bi hev re taştê dixwein, xwarinê dikin û guhd idin wan. Niha ji bo sererastkirina vê di warê aborî de di dest me de materyal hene; lê di warê aborî de hinekî zehmetî hene. Di vî warî de gelê me destek û hêzê dide me."
Sari, bilêv kir ku ji ber derametên şaredariyê hemû ji bo deynan ji Bankeya Îllerê re diçin wan serî li rêya darazê daye û piştî wan serî li darazê daye banke xwestiye bi wan re bazariyekê bike. Sari, got: "Piştî me serî li dadgehê da banke li me vegeriya. Xwestin em li hev bikin. Xwest protokola bi qeyûm re kiriye bi me re jî bike da şaredariyên piştî me bên jî di bin vê tehekmuyê de bin. Dawiyê qeymeqamê navçeyê pêwendî bi me re danî. Her wiha endamên meclîsa şaredariyê yên AKP'î jî xwestin bi me re bazariyekê bikin. Lê em dizanin hêviya gel ji me çî ye. Ji bo vê me got, em ê tu bazariyê nekin û eger bazariyek hebe jî divê li gor qanûnan be an jê em tu bazariyê qebûl nakin. Hevdîtin qediyan û bazarî jî neçû serî. Hew li me vegeriyan. Ji niha û pê ve wê li me vegerin an na em nizanin."
‘DEYN HENE LÊ XIZMET TUNE YE'
Sari, got: "680 milyon TL kredî hatiye kişandin. Eger em tevahiya Geverê bifiroşin heqê vî deynî dernakeve. Tê gotin, 680 milyon TL tenê ji bo qenalîzasyon û ava vexwarinê ahtiye xerckirin. Em dizanin îhaleyên di vî warî de pêşkeşî hin koman hatine kirin. Ev qas pere tê xerckirin lê bermaberiya wê tu xizmet tune ye. Ne qenalîzasyon anîne bajêr ne jî ava vexwarinê. Heta hin mal hene hîn abonetiya wan jî nehatiye çêkirin. Bi 680 TL'yî Gevereke nû dihat çkirin. Lê li holê tu mekanîneke tune ye, lê 680 TL deyn heye. Ev pere bi tu awayî neketiye qaseya şaredariyê rasterast ketiye ehsabê fîrmayên îhale girtine. Niha em di nav van deynan de ne."
Herî dawî Hevşaredar Îrfan Sari, bang li her kesî kir ku bi dildariyî tev li nav xebatên şaredariyê bibin û got, ew guh didin gel û hewl didin pêkve texrîbata hatiye çêkirin ji holê rabikin.
MA / Müjdat Can - Dindar Karataş