Meclisa Dayikên Aştiyê ya Rihayê ji bo şerê ku li Kurdistanê berdewam dike li ber avahiya Partiya Demokratîk a Gelan (HDP) daxuyanî da çapemeniyê. Di daxuyaniyê de pankarta “Ji bo aştiyeke bi rûmet tu jî rabe ser piyan” hate vekirin. Meyaset Korkmaz a li ser navê dayikan axivî, bi lêv kir ku weke Dayikên Aştiyê yên Rihayê li dijî şerê tê meşandin aştiyê dixwazin. Korkmaz, anî ziman ku êdî naxwazin tu çek werin bikaranîn û wiha got: “Di her bikaranîna çekan de dilê dayikên leşker û gerîllayan dişewite. Em êdî naxwazin dilê dayikan bişewite. Em li hemû cîhanê û li Tirkiyeyê şer naxwazin. Ji şer re dibêjin na.”

 

Korkmaz a ji bo pêkanîna aştiyeke birûmet bang kir, bi bîr xist ku heke jin laçikên xwe yên spî biavêjin erdê şer disekine û got: “Em dixwazin şer bisekine.”

 

Dû re dayikan ji bo şer bi dawî bibe laçikên xwe yên spî ji serê xwe kirin û danîn erdî. 

 

Endamên Meclisa Dayikên Aştiyê ku di daxuyaniyê de axivîn jî xwestin tecrîd were rakirin û şer bi dawî bibe. 

 

Daxuyanî bi berzkirina dirûşmeya “Jin jiyan azadî” bi dawî bû.