ŞIRNEX - Dayikên Cizîrê bertek nîşanî êrişên dewleta tirk dan ku tevî biryara KCK'ê ya rawestandina çalakiyên leşkerî êrişên xwe didomîne û got: "Êrişan bisekinînin."
Piştî erdhejên Mereşê yên di 6'ê Sibatê de bi pileyên 7.7. û 7.6 ku bandor li gelek bajaran kir û zêdetirî 50 hezar mirov jiyana xwe ji dest dan, KCK'ê daxuyand ku wan heya demekê çalakiyên xwe yên leşkerî daye sekianndin. Çend roj berê Hevseroka KCK'ê Besê Hozat daxuyand ku vê biryara xwe taloqî heya hilbijartinên 14'ê Gulanê kirine. Lê belê tevî vê biryara KCK'ê jî hêzên tirk li herêmên Zap, Metîna û Avaşînê yên Herêma Kurdistana Federe êrişên xwe yên li dijî hêzên HPG’ê yên di pozîsyona parastinê de ne didomînin.
Dayikên Cizîrê bertek nîşanî berdewamkirina êrişan dan û bang kirin ku demildest ev êriş bên sekinandin.
'HEKE MISILMAN BÛYA ÊRÎŞ NEDIKIR'
Ji dayikan Nafiye Kuçuk (57) anî ziman ku biryara bêçalakîtiyêyê hêviyeke nû li wan peyde kiriye û wiha axivî: "PKK jixwe şer nake, lê dewleta dagirker her roj diçe êriş dike. Dewleta tirk tevahiya Kurdistanê bombarduman dike. Pîr û zarokên wan qetil dike. Çi heqê wan heye ku vî tiştî dikin? Edeleta vê dewletê nîn e. Em şer naxwazin, em aştiyê dixwazin. Kurd bi kuştin û girtinê xelas nabin. Heta ku dilopek xwîn di laşê me de hebe em ê li ber xwe bidin. Dibêjin em misilman in, heger ku misilman bûna di vê meha Remezanê de êriş nedikirin. Em şer naxwazin, em heq û hiqûqê dixwazin. PKK'ê ji ber erdhêjê şer nake û da sekinandin. Em naxwazin ne kurd, ne tirk û ne jî ereb bên kuştin. Em dixwazin çareserî çêbibe. Kezeba me şewitî, em naxwazin kezeba dayikeke din bişewite. Îmana vê dewletê de nîn e. Heger ku îmana wê hebûya di vê meha Remezanê de êriş nedikir. Heke ku îmana wan hebûya dema ku PKK'ê biryara bêçalakîtiyê girt, wan êriş nedikir. Dewletên biyanî jî ji vê biryarê çavê xwe girtine. Em daxwaza aştiyê dikin. Bila Tirkiye van êrişên xwe bide sekinandin."
'DIVÊ TIRKIYE JÎ BIDE SEKINANDIN'
Ji dayikan Zeynep Yilmazê (58) jî got ku heke dewleta tirk di aştiyê de dilsoz be divê vê biryarê esas bigire û wiha got: "Em kuştinê naxwazin. Êdî bes e zarokên me dimirin. Dewlet tenê bi gotina xwe dike. Em şer naxwazin, kuştinê naxwazin. Bila bes dayik bigirîn. Divê dewleta tirk jî vî şerî bide sekinandin. Wan ev şer da sekinandin, divê dewleta tirk jî vî şerî bide sekinandin. Divê Tirkiye jî agirbestê ragihîne. Di erdhejê de ew qas mirov mirin, hîna jî nikare bêje em vî şerî bidin sekinandin. Em naxwazin tu kes bê kuştin. Em naxwazin ji tu aliyan de kuştin çêbibe. Her roj çavên me lê rê ye. Em naxwazin êdî mirinê bibînin. Divê dewleta tirk bersiv bida vê biryarê û wê jî şer bida sekinandin. Ji şer pêvtir tiştekî din nizanin. Ji şer re êdî bes e. Çekan bêdeng bikin."
'DÊ HETA KENGÎ ÇAVÊ ME LI RÊ BE?'
Ji dayikên Cizîrê Fatma Akçayê (68) diyar kir ku tişta ku di vê pêvajoyê de pêwîst aştî ye û ev tişt anîn ziman: "Bila êdî bes kezeba dayikan bişewite. Bila êdî aramiyek bikeve cîhanê. Bila piçek rehma Erdogan jî hebe. Em naxwazin ev şer çêbibe. Em dixwazin ku zarokên dayikan êdî vegerin malên xwe. Ma heta kengî ev şere dê berdewam bike, heta kengî dê çavê dayikan lê rêyan be? Em naxwazin tu nexweşî di navbera her du aliyan de çêbibe. Erdogan dê her bigotina xwe biçe. Em çi qas bibêjin bes e, ew ew qasî zêde dike û çi qasî ji destê wî tê dike. Bila Erdogan bisekine."
'ÇIMA PKK DISEKINE EW NASEKINE?'
Ji dayikan Safiye Karayê (58) bertek nîşanî berdewamkirina êrişên Tirkiyeyê da û ev tişt gotin: "Erdogan zalimek e û çi dixwaze wê dike. Bila di cihê xwe de bisekine. Ma dinyayê nabîne, ma kor e? Bi wan bombeyên xwe feqîr û jaran qetil dikin, malên xelkê talan dikin. Çi heqê wî li ser xelkê heye? Lê binêre çi hat serê dinyayê. Erdhêj çêbû û ew qas alîkarî ji wan mirovan re hat, lê wî hemû kom kir û li ser navê xwe belav kir. Zarokên xelkê guneh in. Dê heta kengî zarokên xelkê bikuje? Dê heta kengî ev gel bindest bin. Bila lingê xwe bikêşe bin xwe û li cihê xwe rûnê, bes xelkê bikuje. Çima PKK şer disekinîne ew nasekinîne? Ew dibêje ez mezinê gelekî me Ne mezinê gelan e, mezinê berika xwe ye. Devê wî beş e û weke guriyan e."
'ÇAWA PKK'Ê DA SEKINANDIN BILA EW JÎ BIDIN SEKINANDIN'
Ji dayikan Zeynep Ergenê (69) jî xwest ku şer bê sekinandin û got: "Em aştiyê dixwazin. Bila bes dayik bigirîn. Heta ku qencî hebe divê xirabî nebe. Em ji aştiyê pêvtir tiştekî din naxwazin. Weke her kesî em jî dixwazin ku aştiyek bikeve cîhanê. Bi xirabiyê tiştek çênabe. Mirov li cihê xwe sekinîbe û yek bê êriş bike nexweş e. Lê em dîsa jî dibêjin aştî. Hiqûq nîn e, heq nîn e. Çawa ku PKK'ê daye sekinandin divê ew jî bidin sekinandin."