AMED - Jinên ku 8’ê Adarê li girtîgehan pêşwazî dikin têkildarî 8’ê Adarê Roja Jinan a Cîhanê peyamek parve kirin û wiha gotin: “Em ê her dim bibêjin hêj bêhtir azadî hêj bêhtir berxwedan.”
Deh girtiyên siyasî yên jin ên li girtîgehên Xarpêt, Kandira û Sîlîvriyê bi boneya 8’ê Adarê Roja Jinan a Cîhanê peyamek şandin. Jinan, 8’ê Adarê li hemû jinan pîroz kirin û peyama têkoşînê dan. Peyama jinan wiha ye:
BOZ: EM MEKANÊN GEWR BERTERAF DIKIN
Necmiya Boz a li Girtîgeha Jinan a Xarpêtê: "Tu çîrok naşibin çîroka DEM’ê. Ne desptêk ne jî dawiya vê çîrokê heye. Em jinên di zindanan de carnan pir xurt carnan jî bi awayekî tevlihev di vê çîrokê de cih digirin. Hin caran em diwestin jî lê ev westabûn me berxwedêrtir û bihêztir dike. Teşiyên me di dest me de, em mekanên gewr ên dewletê bi rengên di dilê xwe de berteraf dikin. Heta ku paradîgmaya me ya demokratîk, ekolojîk û azadîxwaziya jinê dikeve meriyetê.”
ÇIRGANÎŞ: JIYAN EM IN
Hatîce Çirganîş a li Girtîgeha Jinan a Sîlîvrî ya Marmarayê tê ragirtin: "Roja jinan ne tenê rojek e. Li ser mîrateya tevahiya têkoşîna jinê hatiye avakirin. Her çend ku jin tune bên hesibandin jî dê di her hucreyeke civakê de bijîn. Guherîn û veguherînê bi wijdan, dil, mejî û dilovaniya xwe pêk tîne... Civak jinan di nava malan de heps dike. Naxwazin deng û rengê wan bê bihîstin. Weke jinekê ez di hucreyê de têm ragirtin. Di hucreyên li dora me de tenê zilam hene. Gardiyan zilam in. Lê belê dengê jinan li cihê nayê bihîstin olan dide. Ev yek nîşan dide ku bi vê hesta piştevaniyê li her derê, li her malê, di her hucreyê de olan dide. her çend ku weke zindan diyar bikim jî ez di nava zîhniyeteke bavikslara de me.
Weke jinekê têdikoşim lewma rastî êrişên baviksalariyê têm. Ji bo dengê jinan, piştevaniya wan û têkoşîna wan neyê bihîstin, me di tecrîdeke giran de radigirin. Di demekê ku min dengê jinan bihîstî de di danê nîvro de deriyê hucreya min vebû. Min got qey name hatiye. Ji mazgalê zerfek dirêj kirin. Rengê zerfê ji rengên qedexe anku sor bû. Min lê nihêrt ku ji Stenbolê jinekê şandiye, bi gulan hatiye xemilandin û min vekir. Tê de 8 qert hebûn, 8 dil, dengê 8 jinan. Min tevek jî li baxçeyê xwe yê gulan çandin. Bi wan re keniyam, di nava wan rêzikan de min xweşikiya dilê wan parve kir. Di her rêzikê de hucreya min guherî. We mîna rojê hucreya min ronî kir. Ji we gelek hez dikim.
Dibêjin dê hezkirin cîhanê xelas bike. Ya din jî piştevanî û hîskirin. Em dizanin ku cihê em bi destên hev girtî û bi hev re ber bi wê ve dimeşin, şoreşa gulê ye. Di hucreyê de kengî bêriya dengê jinan bikim, dengê jinên azad di dilê min de olan dide. Jinên hêja, em ewqas pir in ku ne hucre ne jî mal bi têrî me nakin. Hema bes ku em dilên xwe di hucreyan de kedî nekin. Tu dikarî dîwaran hilweşînî. Tevek jî bi gavekî dest pê dikin. Dizanim gelek zehmet e û biêş e. Lê bifikire ku tu di zikê xwe de 9 mehan zarokekî mezin dikî, di hundirê wî de hestekî dijî û ji wê êşê zarokek diwelide. Anku jiyan bi xwe diafire. Vaye em jin, em jiyan bi xwe ne. Em jiyan bi xwe ne. Jiyan em in. Em destûrê nedin ku tu kes xwe têkilî jiyana me, mudaxileyî jiyana me bike. Em bi xwe biryarên xwe bidin. Û em bi îradeya xwe pêk bînin. Hêza me bi têrî vê dike, hema bes em vê hêzê derxînin holê.”
KAYA: JINÊN BERXWEDÊR DIBIN HÊVIYA ME
Siyasetmedar Huda Kaya li Girtîgeha Jinan a Sîlîvriyê: “Di xwezayê de gelek jiyanên azad û berxwedêr hene ku kevirên req parçe dikin û mîna peleke vedibe, pêş dikeve û dibin dar. Di nava jiyanê de gelek jin hene ku tevî bi zincîrên nexuyayî hatine dorpêçkirin jî bi berxwedêriya xwe ji nû ve diafirînin û bi vejîn û berxwedanê dibin deng û nefesa me. Tevî hemû kûrahiya tarîtiyê jî jinên berxwedêr hêviyên me yên ji bo ronahiyê, pêşerojê, hezkirin, azadî û aştiyê xurt dikin.”
GUZEL: SILAV JI KESÊN BER BI AZADIYÊ VE DIMEŞIN
Siyasetmedar Semra Guzel a li Girtîgeha Hejmar 1 a bi Ewlekariya Bilind a Kandirayê: “Rengên me bi hev re, li gel hev û di nava hev de ya heqîqetê ne. Mîna têkoşîna me ya jinan. Li her cihê firçe lê dikeve jinek ber bi azadiyê ve baz dide. Silav ji jinên ber bi azadî û heqîqetê ve dimeşin.”
YUKSEKDAG: EM Ê DI PÊŞEROJA AZAD DE HEV HEMBÊZ BIKIN
Hevseroka Giştî ya HDP’ê ya berê Fîgen Yuksekdag a li Girtîgeha Jinan a Kandirayê: “Bila 8’ê Adarê ji bo me tevan, j bo hemû jinan û mirovahiyê bibe wesîleya hêvî, berxwedêrî û keyfxweşiyê. Di demekî ku qêrîna 'Jin, jiyan, azadî' di dîrokê de olan dide, em ji jinên pêşeroja azad re bibêjin ‘ew dengê me bû.’ Em bibêjin di dawiya dawî de jinên hatine bidarvekirin, yên bedenên wan hatin şewitandin, di tevahiya jiyana xwe de biçûk hatine dîtin, di bazarên koleyan de hatine firotin, neçar hatine hiştin ku bi kujerên xwe re bijîn, yên li pey nan, gul û wekheviyê dimeşiyan bi ser ketin... Em ê di pêşerojeke azad de hev hembêz bikin.”
MENGUTAY: JIN, JIYAN, AZADÎ
Sona Mengutay a li Girtîgeha Jinan a Kandirayê: “Bi baweriya avakirina rojên ku jin ji xefikên mirinê hatine xelaskirin, ez 8’ê Adara me, vê roja me pîroz dikim û yek bi yek we tevan bi hesret hembêz dikim. Jin, jiyan, azadî.”
ATAK: PÊŞEROJ DÊ BI RENGÊ JINÊ WERE JIYÎN
Nejla Atak a li Girtîgeha Jinan a Kandirayê tê ragirtin: “Jinên rêzdar; ez di vê roja pîroz a bi rengê jinê xemiliye de keyfxweş im ku bi we re hatim bahev. Yekana daxwaza min ew e ku hemû rojan bi pêşerojeke bi rengê jinê were jiyîn ava bikin. Wê demê em ê rojên xweştir bi hev re bijîn. Bi hêviya ruhê we yê berxwedanê her tim weke tavê biriqe 8’ê Adarê Roja Jinan a Cîhanê li we pîroz dikim. Bi hêviya ku em di cihana jinên azad de hev bibînin, ‘Jin jiyan azadî’.”
BÛLÛT: EM Ê ZÊDETIR BIBÊJIN AZADÎ
Gazel Bûlût a li Girtîgeha Jinan a li Kandirayê: “Dema mêran kuşt, şerê ji bo parastina jiyanê dikeve berê me jinan. (Clara Zetkîn). Ji bom in 8’ê Adarê weke sersala jinan e. Dibêjin ya hûn çava bikevin sersalê wisa dom dike’ Em her sal hinek din berxwedanê hinek din piştevaniyê lê zêde dikin. Bêguman em ê li hundir, li derve, li malê li kolanan, li zeviyan li her derê ku bêhna jinan lê ye em ê zêdetir bêjin berxwedan û azadî. Heta ku jineke bênefes hatiye hiştin nemîne. Bijî 8’ê Adarê bijî piştevaniya jinan û têkoşîna azadiyê.”
BAGCI: EZ PIŞTEVANIYA JINAN SILAV DIKIM
Damla Bagci ya li Girtîgeha Jinan a Kandirayê tê ragirtin jî 8’ê Adarê Roja Jinan a Cîhanê li hemû jinan pîroz kir û piştevanî û têkoşîna azadiyê ya jinan silav kir.
TEPELÎ: EM Ê CÎHANEKE AZADIXWAZIYA ZAYENDÎ AVA BIKIN
Denîz Tepelî ya li Girtîgeha Jinan a Kandirayê tê ragirtin jî wiha got: “Ez we hemûyan bi germahiya hevrêtiya jinan hembêz dikim. 8’ê Adarê li we pîroz be. Azadî rêwîtiyeke tejî bi xwîn, êş û mirine. Bi berxwedana me ya jinê ya destanî ku di dîrokê de cih ji jinê re çêkiriye, vîna jinê, hevrêtiya jinê û şoreşa jinê bi berdleke mezin ava kiriye, êdî jin pêşenga azadiyê ya hemû cîhanê ye û porê jinê alaya azadiyê ye. Hêj gelek rêya me heye ku em bimeşin. Em dizanin ku hêza me ya herî mezin têkoşîna me ya rêxistinî ye. Vê rêya birûmet em anîn bahev. Em qet tenê nemeşiyan. Em li girtîgehê heta di tecrîdê de jî bi tenê neman, me hevdû qet bi tenê nehişt. Bi baweriya ku em ê şoreşa jinê ku berhema me ya herî mezin e û cîhaneke azadîxwaziya zayendî bi hev re ava bikin, 8’ê Adarê li we pîroz dikim.”
MA / Mujdat Can