ENQERE - Di Partiya Çepên Kesk de bi pergala fermûarê ji sedî 40 namzet ji jinan pêk hatin. Di lîsteyên CHP’ê de ev rêje bû ji sedî 26, di AKP’ê de bû ji sedî 19, di MHP’ê de jî bû ji sedî 12.”
Partiyên siyasî, lîsteyên xwe yên parlamenterên ji bo di hilbijartinên 14'ê Gulanê de namzet bên nîşandan qedandin û pêşkêşî Desteya Hilbijartinê ya Bilind (YSK) kirin. AKP û hevkarê wê MHP ku dema desthilata wan de jin hatin hedefnîşandan, bûyerên tacîz û tecawizê û cînayetên jinan zêde bû, di lîsteyên namzetan de jî tune hatin hesibandin.
DI TIFAQA CÛMHÛR DE JI JINAN RE CIH NÎNE!
Di lîsteya 600 namzetên parlamenteriyê yên ji aliyê AKP'ê ve pêşkêşî YSK’ê hatin kirin de, bi tenê 113 jinan cih girtin. Di lîsteya namzetan a hevkarê desthilata AKP'ê, MHP'ê de jî tenê 73 jinan cih girtin. Di AKP’ê de ji sedî 18,83 jin namzet hatin nîşandan, di MHP’ê de ev rêje daket ji sedî 12,16’an.
DI TIFAQA MILET DE PERGALA FERMÛARÊ NEHATE PÊKANÎN
Di lîsteya ku Partiya Gel a Komarê (CHP) pêşkêşî YSK’ê kir de 580 namzetan cih girtin. Ji van namzetan tenê 153 jin in. Ji 385 namzetên ku Partiya Îyî nîşandan jî 145 jin in. Ji sedî 26,37 parlamenterên di lîsteya CHP’ê de cih digirin jin in. Ev rêje li Partiya Îyî bû ji sedî 37,66.
LI PARTIYA ÇEPÊN KESK JI SEDÎ 40 NAMZETÊN JIN IN
Di lîsteyên Partiya Çepên Kesk de pergala fermûarê hate pêkanîn. Di lîsteya pêşkeşî YSK’ê hate kirin de ji 490 parlamenteran ji sedî 193 ji jinan pêk hatin. Dîsa ji 398 kesên ku Partiya Karkerên Tirkiyeyê (TÎP) ya di bin Tifaqa Ked û Azadiyê de cih digire jî 161 kes ji jinan pêk tên. Di Partiya Çepên Kesk de ji sedî 39,38 ji jinan pêk tê di TÎP’ê de jî ev rêje bû ji sedÎ 40,45.
MA / Yusra Batihan