Serokê Odeya Bijîşkên Enqerê Prof. Dr. Vedat Bûlût di civîna çapemeniyê ya derbarê întîxarên zêde bûyîn hat lidarxistin de axivî û got: “Di dema AKP’ê de 47 hezar û 835 kesan întîxar kirin. Pirsgirêka sereke polîtîkayên aboriyê yên desthilatdariyê ne.”
Waniyan anî ziman ku sedema krîza aborî zext û zoriyên li ser kurda û muxalefetê ne û gotin, heta şer bi dawî nebe ne krîz hel dibe jî wê gel rihet bibin.
Li gorî raporan li Tirkiye rêjeya betaliyê ji sedî 33 ye. Lê li bajarên herêmê ev rêje zêdetir e. Li Amedê li hin malbatan betalî ji sedî 100 e. Mînaka vê yekê malbata Dundar a xwedî 7 nifûsî ye. Malbata Dundar ji ber hemû betal in, nikarin debara xwe bikin.
Serokê Şaxa Sendîkaya Sosyal-Îş'ê ya Stenbolê Mûstafa Agûş, destnîşan kir ku xebatkarên li AVM'yan di şert û mercên zor û zehmet de dixebitin û got, bi berxwedana karkerên Kotonê re xebatkarên li AVM'yan tozika mirinê ya li ser xwe avêtine.
Berdevkê Platforma Li Dijî Nukleerê ya Sînopê Zekî Karataş, ji bo santralên nukleerê yên tên çêkirin anî ziman ku Tirkiyeyê vediguherînin çopgeha nukleerê û got, bi têkoşîneke topyekûn wê santral bên astengkirin.
Dê ji bo Zirarên Peyvirê ya ku tê gotin rê li pêş nelirêtiya butçeya welat vedike, ji butçeya sala 2020'an 99 milyar û 579 milyon TL pere bê veqetandin. Parlamenterê HDP’ê Garo Paylan, diyar kir ku di bin navê “Zirarên Peyvirê" de pereyan didin fîrma û bankayên ku bîlançoyên xwe xerç kirine.
Karkeran anî ziman ku fatûreya krîza aborî li wan tê barkirin û helwesta partî û sendîkayan rexne kirin. Karkeran, got: "Em ancax dikarin bi çalakiyên gel ên rêxistinkirî ji krîzê derkevin."
Aborîzan Ozgur Muftuoglû, anî ziman ku şik û guman ew e ku ji ber krîza aborî wê bûyerên întiharê zêde bibin û got: "Îktîdar kesên birçûbûnê qebûl nakin, dike terorîst. Mirovên nikarin zikê xwe têr bikin helbet wê bi awayekî nerazîbûna xwe nîşan bidin. Întiharên pêk tên jî îfadekirina van bertekan e."
Endamên Platforma KESK'ê yên Edene û Antalyayê diyar kirin ku li hemberî enflasyona heyî her ku diçe meaşê wan kêm dibe bi çalakiyan bertekên xwe anîn ziman.
Li Taksîmê di kêliya hilweşandina avahiyeke ku talûkeya hilweşandina wê hebû de karkerekî birîndar bû.
Midûreyat Polîsan a Enqereyê, dawî li karê 300 îşportavanên li Kizilayê di saetên êvaran de dezgehan vedikin û alav û amûran difiroşin anî. Her çend Walîtiya Enqereyê ev yek red kir jî rayedarekî şaredariya Çankayayê diyar kir ku "Vekirina Îşporta li vir sûc e."
Platforma Şaxan a Sendîkaya Karkeran a Stenbolê, bi armanca balê bikişîne ser kriza aborî û întîharên dawî, daxuyanî dan û diyar kirin ku ya dibe sedema întîharê xizanî, sefalet û kriza aborî ye.
Li Lîjneya Giştî ya Meclisê dewrkirina peywir û rayeyên BDDK'ê ya ji bo Bankaya Navendî hat gufûgokirin û qebûl bû. Bankaya Navendî, di hêla diravdanê de dê bibe otorîteya rayedar.
Girêdayî Wezareta Karên Hundir bi giştî 323 hezar leşkerên bê paye yên bi pere û polis û notirvan dixebitin. Ji ber polîtîkayên ewlehiyê timik hejmara personelên wezaretê zêde dibin. Xerckirina ser diravdaniyê ya Wezaretê ku di sala 2019'an de ku 14 milyar bû, di 2020'an de dê derkeve 24 milyar TL'yî.
Mêrsîniyan dan zanîn ku êrişên Tirkiyê yên li dijî Rojava krîza aborî kûr kiriye û gotin: “Çi karê me heye li Sûriyê? Ev şer aboriya me têk dibe.”