Piştevaniya Mor Dayanişmayê, wê bi boneya 10'emîn salvegera xwe di 26'ê gulanê de bi dirûşma "Em ne bi tenê, em bi hev re bihêz in" 4'emîn Konferansa Jinan a Tirkiyeyê li dar bixe. Konferansên ku du salan carekê bi awayekî navendî tên lidarxistin, îsal wê li Ege, Marmara û Çûkûrovayê bi awayekî hevwext bên lidarxistin. Konferansa li Îzmîrê wê li Navenda Çandê ya Turkan Saylan a Alsancakê, ya li Marmarayê wê li Navenda Çandê ya Nazim Hîkmet a Şîşliyê û ya li Çûkûrovayê jî wê li Navenda Çandê ya Yaşar Kemal a Edeneyê bê lidarxistin. 

 

Endama Koordînasyona Navendî ya Piştevaniyê ya Piştevaniya Mor Dîdar Gulê têkildaîr mijar û naveroka konferansan de axivî. 

 

'EM BI HEV RE BIHÊZ IN'

 

Gulê diyar kir ku wê pirsgirêkên jinan bên gengeşekirin û got ku mijara konferansê bilindkirina têkoşîna li hemberî êrişên desthilata AKP-MHP'ê yên li hemberî hemû derdoran e. Gulê destnîşan kir ku konsepta êrişên li hemberî jinan bi cinayet, tundî, taciz, tecawiz û necezakirina kiryaran didome û got: "Rêxistinên jinan d vê pêvajoyê de xwe birêxistin dikin û rê li ber tevgera civakî vedikin. Em Piştevaniya Morê jî parçeeke vê ne. Me got 'Ne bi tenê, em bi hev re bihêz in' û me dest bi vê pêvajoyê kir."

 

ÇARE RÊXISTINBÛYÎN E

 

Gulê bilêv kir ku ew dixwazin bi van konferansan yekîtiya jinan û têkoşîna rêxistinbûyî xurt bikin û got ku her ku êriş zêde bibin têkoşîn jî zêde dibe. Gulê destnîşan kir ku jin dînamîka herî bihêz a têkoşîna rêxistinkirî ne û got: "Rêxistinbûyîn bi qasî nan û avê ji bo me girîng e." 

 

Gulê got: "Ger dengê me hemûyan bibe yek, em ê karibin desthilata faşîst a AKP-MHP'ê têk bibin û rê li ber qirkirina jinan bigirin."